Bütün dünyaya kifayət edəcək qədər qızıl kəşf edildi - VİDEO

Cənubi Amerikanın Surinam Respublikasında aparılan kəşfiyyat işləri nəticəsində yüksək tenorlu qızıl yatağı aşkarlanıb.

Sonxeber.az xarici mediaya istinadən xəbər verir ki, Kanadaya məxsus mədən şirkətinin indiyədək qazıntı aparılmamış ərazidə həyata keçirdiyi ilk sondaj çalışmaları sənaye standartlarını aşan saflığa malik qızıl damarını üzə çıxarıb.

Surinamın cənub-şərqində, Guiana Shield bölgəsində fəaliyyət göstərən Founders Metals şirkəti Maria Geralda sahəsində apardığı ilkin qazıntılar zamanı 22,5 metr uzunluğunda və hər ton süxurda 11,88 qram qızıl (g/t) olan kəsim müəyyən edib. Mədən sənayesində "yüksək keyfiyyətli" göstərici kimi qəbul edilən 10 qram/ton həddinin aşılması bu tapıntının əhəmiyyətini artırır.

Mütəxəssislərin qiymətləndirməsinə görə, həm ehtimal olunan ehtiyat həcmi, həm də filizin yüksək saflıq dərəcəsi baxımından sözügedən kəşf qlobal miqyasda diqqət çəkir. Bildirilir ki, regionun geoloji quruluşu qızılın yüksək konsentrasiyada formalaşmasına əlverişli şərait yaradıb.

Təxminən 1,7 milyard illik geoloji tarixə malik olan və dünyanın ən zəngin mineral qurşaqlarından biri sayılan Guiana Shield ərazisində fay xətləri boyunca yaranmış çatların zamanla kvars və qızıl tərkibli hidrotermal mayelərlə dolması nəticəsində yüksək tenorlu yataqlar formalaşıb.

Hazırda ərazidə əlavə qiymətləndirmə və analiz işlərinin davam etdirildiyi bildirilir. Kəşfin real ehtiyat həcmi və kommersiya potensialı növbəti mərhələdə aparılacaq genişmiqyaslı geoloji araşdırmalardan sonra dəqiqləşdiriləcək.

Telegramda izləyin