Qabyuyan maşın tableti əlində partlayan qadının gözündə ciddi problemlər yaranıb - VİDEO

Məişətdə geniş istifadə olunan qabyuyan maşın tabletləri ilə bağlı xəbərdarlıq sosial mediada müzakirələrə səbəb olub. Türkiyədə yaşayan gənc qadın Begüm Akyol yaşadığı hadisəni paylaşaraq oxşar təhlükələrə diqqət çəkib.

Sonxeber.az türk mediasına istinadən xəbər verir ki, hadisə gecə saat 00:30 radələrində baş verib. Akyol qabyuyan maşını işə salmaq üçün tableti xüsusi bölməyə yerləşdirmək istəyərkən məhsulun qəfil partlayaraq üzünə, xüsusilə də gözünə sıçradığını bildirib. Onun sözlərinə görə, əvvəlcə görməsində zəifləmə hiss edib, daha sonra gözündə güclü yanma və batma başlayıb. Təcili tibbi yardım şöbəsində gözü yuyulub və damcılar təyin edilsə də, ağrının uzun müddət davam etdiyini deyib.

Həkim müayinəsi zamanı tabletin tərkibindəki kimyəvi maddələrin buynuz qişaya zərər vurduğu və gözdəki damarları yandırdığı müəyyən edilib. Mütəxəssislər bu cür məhsulların tərkibində yüksək konsentrasiyalı təmizləyici maddələr olduğunu və onlarla ehtiyatla davranmağın vacibliyini vurğulayırlar.

Akyol sosial şəbəkədə paylaşdığı görüntülərlə insanların diqqətini bu riskə yönəltmək istədiyini bildirib. O, hadisəni yaşamazdan əvvəl belə bir təhlükənin mümkünlüyünü düşünmədiyini, lakin paylaşımından sonra çox sayda oxşar hadisə ilə qarşılaşan insanların ona yazdığını qeyd edib.

Mütəxəssislər məişət kimyəvi vasitələrindən istifadə zamanı qoruyucu tədbirlərə əməl etməyi, məhsulları açarkən üz və gözlə təmasdan qaçmağı, mümkün olduqda qoruyucu əlcək və eynəkdən istifadə etməyi tövsiyə edirlər. Gündəlik istifadə olunan vasitələr belə, düzgün istifadə edilmədikdə ciddi sağlamlıq riskinə çevrilə bilər.

Telegramda izləyin