Veymo dar küçədə tərəddüd etdi: Sürücüsüz avtomobil 3 dəqiqəlik gecikməyə səbəb oldu - VİDEO

ABŞ-nin San Fransisko şəhərində fəaliyyət göstərən sürücüsüz taksi xidməti Veymonun (Waymo) avtomobillərindən biri dar, iki istiqamətli küçədə hərəkət zamanı çətinliklə üzləşib.

Sonxeber.az xarici mediaya istinadən xəbər verir ki, sosial şəbəkələrdə yayılan görüntülərə görə, pilotsuz avtomobil qarşılıqlı hərəkətin olduğu ensiz yolda manevr etməkdə tərəddüd edib və qısa müddətlik dayanıb. Nəticədə küçədə nəqliyyat axınında gecikmə yaranıb.

Paylaşım müəllifi bildirib ki, oxşar hallar əvvəllər də təkrarlanıb və Veymo avtomobilləri xüsusilə dar küçələrdə hərəkət zamanı çətinlik yaşayır. Onun sözlərinə görə, təqdim olunan video 3,7 dəfə sürətləndirilib və ümumilikdə hadisə təxminən 3 dəqiqə davam edib.

Görüntülər sosial şəbəkə istifadəçiləri arasında geniş müzakirələrə səbəb olub. İstifadəçilər sürücüsüz nəqliyyat vasitələrinin şəhər infrastrukturuna uyğunluğu və real yol şəraitində operativ qərarvermə imkanları ilə bağlı suallar səsləndiriblər.

Qeyd edək ki, Veymo ABŞ-nin bir sıra şəhərlərində sürücüsüz taksi xidmətini sınaq və kommersiya rejimində həyata keçirir.

Telegramda izləyin