Məşhur futbolçu imza istəyən şəxsin əşyasına düz xətt çəkdi: Görün hansı səbəbdən! - VİDEO

Manchester United F.C.-in futbolçusu Noussair Mazraoui-nin azarkeşlərlə bağlı davranışı sosial mediada müzakirələrə səbəb olub.

Sonxeber.az xarici mediaya istinadən xəbər verir ki, mərakeşli müdafiəçi imza istədiyi deyilən bir qrup şəxsin təqdim etdiyi əşyaları imzalamaq əvəzinə onların üzərinə düz xətt çəkərək yoluna davam edib. Həmin anların görüntüləri qısa müddətdə sosial şəbəkələrdə yayılıb və geniş müzakirə olunub.

İddialara görə, bəzi şəxslər futbolçulara kütləvi şəkildə forma və digər əşyalar imzalatdıraraq daha sonra bu məhsulları satışa çıxarır və bundan qazanc əldə edirlər. Mazraouinin də məhz belə bir qrupla qarşılaşdığı və buna etiraz olaraq imza atmaq əvəzinə əşyaların üzərini xətlə cızdığı bildirilir.

Futbolçunun bu addımı sosial mediada birmənalı qarşılanmayıb. Bəzi istifadəçilər onun davranışını imza alveri ilə məşğul olanlara qarşı prinsipial mövqe kimi qiymətləndirib. Digərləri isə bu hərəkəti sərt və hörmətsiz addım hesab edərək tənqid edib.

Hadisə futbol dünyasında imza alveri mövzusunu yenidən gündəmə gətirib və məşhur idmançıların bu cür hallara münasibəti ilə bağlı müzakirələri artırıb.

Telegramda izləyin