Şəhərin ən sıx yolunda yaranan tıxacın səbəbi evlilik təklifi imiş - VİDEO

İstanbulun ən işlək nöqtələrindən birində baş verən evlilik təklifi hadisəsi həm romantik anlara, həm də ciddi narazılığa səbəb olub.

Sonxeber.az türk mediasına istinadən xəbər verir ki, işlək yolun ortasında edilən sürpriz təklif nəticəsində yol bir müddət tamamilə bağlanıb və uzun avtomobil tıxacı yaranıb.

Hadisə metropol şəhər İstanbulun sıx hərəkətli küçələrindən birində qeydə alınıb. Görüntülərə əsasən, gənc lüks avtomobilini yolun ortasında saxlayaraq nəqliyyatın hərəkətini dayandırıb. Daha sonra avtomobildən enən gənc, dostlarının yandırdığı məşəllərin fonunda sevgilisinin qarşısında diz çökərək ona evlilik təklifi edib.

Romantik an yaratmaq istəyən gəncin bu addımı isə arxada gözləyən sürücülərin narazılığı ilə qarşılanıb. Uzun müddət hərəkət edə bilməyən sürücülər siqnallarla etirazlarını bildiriblər. Həmin siqnal səsləri isə sosial şəbəkələrdə yayılan videonun fonuna çevrilib.

Gözlənilməz anda evlilik təklifi alan gənc qız isə təəccübünü gizlədə bilməyib. Böyük sevinc yaşayan qız "Bəli" cavabını verərək gəncə sarılıb.

Hadisənin görüntüləri qısa müddətdə sosial şəbəkələrdə geniş yayılıb və müzakirələrə səbəb olub. Bəzi istifadəçilər bu addımı sərt tənqid edərək "Öz xoşbəxtliyiniz naminə minlərlə insanın haqqını tapdalaya bilməzsiniz. Bu romantika deyil, yol hərəkətinə hörmətsizlikdir" fikrini səsləndiriblər. Digərləri isə gənclərin bu xoş anına daha anlayışla yanaşmağın lazım olduğunu bildiriblər.

Qeyd olunur ki, bu cür hallarda hüquq-mühafizə orqanları tərəfindən "yol hərəkətinin qarşısını alma" və "ictimai asayişi pozma" kimi maddələr üzrə inzibati tədbirlər görülə bilər.

Telegramda izləyin