Reanimasiya yatan İlber Ortaylının vəziyyəti açıqlandı

Türkiyənin tanınmış tarixçilərindən olan İlber Ortaylı xəstəxanaya yerləşdirilib.

Sonxeber.az türk mediasına istinadən xəbər verir ki, tarixçi və yazıçı, professor İlber Ortaylı səhhətində yaranan problemlər səbəbindən bir müddətdir xəstəxanada müalicə alır. Məlumata görə, o artıq beş gündür reanimasiya şöbəsində həkim nəzarəti altında saxlanılır.

Ailəsi sosial şəbəkə vasitəsilə yaydığı açıqlamada bildirib ki, "İlber Ortaylının beş gündür reanimasiya şöbəsində müalicəsi davam edir. Vəziyyəti stabildir. O, öz sahəsində çox peşəkar həkim heyəti tərəfindən böyük diqqətlə nəzarətdə saxlanılır. Ümid edirik ki, hər kəsin xoş arzuları və duaları da ona kömək olacaq".

78 yaşlı alim tarix sahəsindəki elmi fəaliyyəti ilə yanaşı, yazdığı kitablar və populyar çıxışları ilə də geniş oxucu auditoriyasına xitab edib. Onun tanınmış əsərləri arasında "İmparatorluğun En Uzun Yüzyılı", "Osmanlı’yı Yeniden Keşfetmek", "Tarihin İzinde" və "Bir Ömür Nasıl Yaşanır" yer alır. Bu əsərlər tarixə maraq göstərən oxucular arasında geniş yayılıb və böyük maraqla qarşılanıb.

Telegramda izləyin