Məşhur market çoxsaylı qida məhsulunu niyə zibil qutusuna atıb? - VİDEO

Türkiyədə çoxsaylı filialları olan bir məşhur marketlə bağlı yayılan görüntülər sosial şəbəkələrdə geniş müzakirələrə səbəb olub.

Sonxeber.az türk mediasına istinadən xəbər verir ki, sözügedən görüntülər marketlərdən birinin arxa hissəsində çəkilib. Videoda son istifadə tarixi yaxınlaşan və ya qablaşdırılması zədələnmiş olduğu deyilən çox sayda qida məhsulunun zibil konteynerlərinə atıldığı görünür. Bildirilir ki, bəzi məhsullar başqaları tərəfindən istifadə olunmaması üçün qəsdən yararsız hala salınaraq məhv edilib.

Görüntülərin yayıldığı dövrdə ölkədə yaşayış xərcləri və dolanışıq problemlərinin tez-tez gündəmə gəlməsi məsələyə reaksiyanı daha da artırıb. Məhəllə sakinlərindən biri tərəfindən çəkildiyi deyilən videoda marketin arxa hissəsində yerləşən konteynerlərdə süd, qatıq, pendir və çörək kimi müxtəlif qida məhsullarının olduğu diqqət çəkir. İddialara görə, bəzi məhsulların qablaşdırması qəsdən deşilib və qidalar tullantıların arasına qarışıb.

Videoda çox sayda süd paketinin konteynerə boşaldıldığı və içəridə mayelərin axdığı görünür. Qatıq və pendir kimi süd məhsullarının qablaşdırmalarının deşildiyi, çörəklərin isə zibil torbalarının arasında qaldığı bildirilir.

Görüntünü lentə alan şəxs market əməkdaşlarının bəzi məhsulları zibilə atmadan əvvəl qəsdən zədələdiyini iddia edib. Şahid ehtiyacı olan insanların və ya heyvanların istifadə edə biləcəyi qidaların yararsız hala salındığını bildirərək buna etiraz edib.

Görüntülərin sosial mediada yayılmasından sonra çox sayda istifadəçi qida israfına qarşı sərt reaksiyalar verib. Bəzi sosial şəbəkə istifadəçiləri belə halların qarşısının alınması üçün nəzarətin gücləndirilməsini tələb edərək aidiyyəti qurumları məsələ ilə bağlı araşdırma aparmağa çağırıblar.

Telegramda izləyin