Fizikanı aldatmaq olmaz: Niyə Qodzilla boyda canavarlar reallıqda mövcud ola bilməz?

Filmlərdən tanıdığımız Qodzilla və ya Kinq-Konq kimi nəhəng canavarlar müəyyən populyarlığa malikdir. İnsanlar həm heyran olur, həm də qorxur. Və bütün bunlar bir əsas səbəbdən irəli gəlir - absurd dərəcədə böyük ölçülər. Lakin həqiqət budur ki, bu qədər böyük varlıqlar planetimizdə mövcud ola bilməz.

Qaynarinfo xəbər verir ki, "IFL Science" elmi jurnalının yazdığına görə, real Qodzillanın ortaya çıxmasının əsas əngəli kvadrat-kub qanunudur. Onun mahiyyəti ondadır ki, obyektin ölçüsü artdıqca onun səth sahəsi kvadratla artır, həcm və kütləsi isə kubla.

Məsələn, bir sandığı götürüb iki dəfə böyütsək, onun hündürlüyü, uzunluğu və eni ikiqat artacaq, bütün səthlərin sahəsi dörd dəfə artacaq, daxili həcm isə səkkiz dəfə böyüyəcək.

Canlı orqanizmlər üçün bu qanun heyvanın böyüklüyünə müəyyən məhdudiyyətlər qoyur. Məsələ burasındadır ki, bütün bədəni dəstəkləyən əzələ və sümüklərin gücü onların kəsik sahəsindən asılıdır. lakin varlığın ölçüsü böyüdükcə, çəkisi sümüklərin və əzələlərin kəsik sahəsindən çox daha sürətlə artır. Nəticədə müəyyən bir ölçüdən sonra sümüklər və əzələlər bədəni daşıya bilməyəcək.

İlk Qodzilla 1954-cü ildə ekranlara çıxanda 50 metr hündürlükdə və 20 000 ton çəkidə idi. Hər yeni remeyklə onun hündürlüyü artırılıb. Müasir filmlərdə Qodzilla artıq 318 metr hündürlükdə və 100 000 ton çəkidə təsvir edilir. Elmi hesablamalara görə, belə varlıq sadəcə hərəkət edə, hətta yaşaya da bilməz.

"Bəs dinozavrlar?" deyə soruşa bilərsiniz. Nyu-Meksiko Universitetinin paleoekoloq professoru Felisa Smit "Live Science" nəşrinə şərhində bildirib ki, tarixdə mövcud olmuş ən iri quru heyvanlar təxminən 90 ton çəkidə olub (argentinozavr). Nəzəri maksimum isə təxminən 110 tondur. Suda isə böyük heyvanların hərəkəti bir az asan olduğundan, rekordçu mavi balina təxminən 150 ton çəkidədir.

Argentinozavr və mavi balina ilk Qodzilla ilə müqayisədə nisbətən "cırtdan" görünür, çünki o, sadəcə 20 000 ton çəkidə idi. Müasir "nəsillərini" isə deməyə ehtiyac yoxdur.

Kvadrat-kub qanunu canlıların ölçüsünə qoyulan yeganə məhdudiyyət deyil. Metabolizm və digər fizioloji amillər də bu məsələdə rol oynayır.

Telegramda izləyin