Qulaqlarını pambıq çubuqla təmizləyənlərə XƏBƏRDARLIQ

Bir çox insan qulaqlarını pambıq çubuqlarla təmizləməyi gigiyenanın vacib hissəsi hesab edir.

Lent.az-ın xarici mediaya istinadən bildirdiyinə görə, həkimlər xəbərdarlıq edir ki, bu vərdiş faydadan çox zərər verə bilər.

Qulağa pambıq çubuq salanda nə baş verir

İnsanlar çox vaxt qulağı təmizləmək üçün instinktiv olaraq pambıq çubuqdan istifadə edirlər. Lakin bu zaman qulaq kiri çıxmaq əvəzinə daha dərinə itələnə bilər və qulaq kanalının dərisi zədələnə bilər.

Tibb elmləri doktoru və otolarinqoloq Nikole Aaronson bildirib ki, pambıq çubuq qulaq kanalına daxil edildikdə divarlara sürtünür və qulaq kirini daha dərinə itələyir. Əgər çubuq çox dərinə daxil edilərsə, qulaq kiri qulaq pərdəsinə doğru sıxıla bilər. Bu isə eşitməyə mənfi təsir göstərə bilər. Bundan əlavə, qulaq pərdəsinin zədələnməsi və ya deşilməsi riski də var. Belə zədələr isə xarici otit kimi qulaq iltihabına səbəb ola bilər.

Mütəxəssislər qeyd edir ki, qulaqlar öz-özünü təmizləmə mexanizminə malikdir. Bu mexanizm qulaq kirini yumşaldaraq onu tədricən qulaqdan çıxarır. Hətta az miqdarda qulaq kiri faydalıdır, çünki qulaq kanalının dərisini qoruyur.

Qulaqları necə düzgün təmizləmək lazımdır

Qulaq kiri əslində qoruyucu funksiyaya malikdir. O, antimikrob xüsusiyyətlərə sahibdir və qulağı təmiz saxlamağa kömək edir. Həmçinin tozdan, çirklərdən, göbələk sporlarından və hətta kiçik həşəratlardan qoruyucu baryer yaradır. Orqanizm adətən qulaq kirini lazım olduqda özü xaric edir. Eşitmə qabiliyyətində qəfil dəyişiklik olduqda isə mütləq həkimə müraciət etmək lazımdır.

Xüsusilə aşağıdakı əlamətlər narahatlıq doğurmalıdır:

qulaqda ağrı

eşitmənin zəifləməsi

qulaqda dolğunluq hissi

başgicəllənmə

qulaqdan axıntı

Telegramda izləyin