"10 milyon avro tələb etmək istəyirdim, amma iş tez olsun deyə 5 milyon avro tələb etdim" - Prezident ailəsini şantaj edən şəxs - VİDEO

Azərbaycanda tanınmış şəxslərə və dövlət rəsmilərinə qarşı xaricdə yaşayan təxribatçıların iştirakı ilə həyata keçirilən böyük bir şantaj və qarayaxma kampaniyasının üstü açılıb.

Sonxeber.az xəbər verir ki, bu ilin əvvəlindən başlayaraq xaricdə yaşayan Mehman Hüseynov, Emin Hüseynov, Qabil Məmmədov və digərləri müxtəlif platformalarda Alyona Əliyeva barədə böhtan xarakterli məlumatlar yaymağa başlayıblar. Hətta M.Hüseynov canlı yayımların birində saxta videofraqmentlər nümayiş etdirib.

Eyni vaxtda xaricdə olan bir şəxs xarici telefon nömrələri və elektron poçt vasitəsilə Azərbaycanın yüksəkvəzifəli şəxsləri ilə əlaqə saxlayaraq onları şantaj etməyə başlayıb. Həmin şəxs əlində Alyona Əliyevaya məxsus olduğunu iddia etdiyi kadrların olduğunu bildirərək, bu görüntüləri yaymamaq müqabilində beş milyon avro tələb edib.

Dövlət Təhlükəsizliyi Xidmətində (DTX) faktla bağlı Cinayət Məcəlləsinin müvafiq maddələri ilə cinayət işi başlanılıb. Keçirilən əməliyyat nəticəsində bu cinayətdə şübhəli bilinən Azərbaycan vətəndaşı F.S. saxlanılıb. İstintaq zamanı o, cinayətini etiraf edərək detalları açıqlayıb:

"11 fevral tarixində mən Mehman Hüseynov ilə əlaqə yaratmağa çalışdım. Facebook səhifəsi vasitəsilə ona mesaj göndərərək xahiş etdim ki, əlində olan videoları mənə paylaşsın. Qısa bir müddət sonra isə Elman Əliyev və Zəki Səlimov həmin materialları mənimlə paylaşdılar. Hətta Elman Əliyev mənə iki video göndərmişdi. Videoları izlədikdən sonra həqiqətən onların doğru olub-olmadığına inanmadım, vəziyyət çox fərqli görünürdü.

Bütün məlumatları əldə etdikdən sonra, Mehriban Əliyeva, Arzu Əliyeva və Leyla Əliyevanın Facebook səhifələrinə mesaj göndərdim. Onlara bildirdim ki, Alena xanımın şəxsi həyatına dair müəyyən materiallar mənim əlimdədir və onlarla əlaqə saxlamaq istəyirəm.

Heç bir reaksiya olmadığı üçün 15 fevral tarixində Heydər Əliyev Fondunun rəsmi saytına məktub yazaraq öz e-mail ünvanımı və mobil nömrəmi təqdim etdim. Məktubda açıq şəkildə qeyd etdim ki, əgər mənimlə əlaqə saxlamasalar, əldə etdiyim bu məlumatları bütün dünyaya yaymaq məcburiyyətində qalacağam.

Təxminən ayın 18-i Cavid Qurbanovla əlaqə yaratmağa nail oldum. Cavid Qurbanovla biz Telegram vasitəsi ilə əlaqə qurduq, danışıqlar apardıq. Mən Cavid Qurbanova şərtimi səsləndirdim. Dedim ki, mən 10 milyon avro tələb etmək istəyirdim, amma fikrimi dəyişdim və bu iş tez olsun deyə 5 milyon avro tələb edirəm", - deyə saxlanılan şəxs ifadəsində bildirib.

Telegramda izləyin