Ailə institutu niyə zəifləyir? - AÇIQLAMA

Müasir cəmiyyətin sürətlə dəyişməsi ailə institutuna da təsirsiz ötüşmür. Əvvəllər xüsusi dəyər olaraq qəbul edilən ailə indi daha keçici bir quruma çevrilməkdədir.

Bu dəyişikliklərin səbəblərini anlamaq, həm fərdi, həm də sosial səviyyədə ailə anlayışının gələcəyini dəyərləndirmək üçün vacibdir.

Bəs görəsən müasir dövrdə ailə institutunun zəifləməsinin səbəbləri nələrdir?

Sonxeber.az -a danışan sosioloqlar bildirirlər ki,insanlar fərdi azadlıq və şəxsi zövqləri ictimai norma və öhdəliklərdən üstün tutduqda, ailəni sabit sosial institut kimi deyil, müvəqqəti və elastik bir razılaşma kimi qəbul edirlər :

Müasir dövrdə ailə institutunun zəifləməsinin səbəbləri bir deyil, bir neçə kompleks amillə bağlıdır. Ən başlıca amillərdən biri qloballaşma fonunda qərb dəyərlərinin, xüsusilə fərdiyyətçi və materialist yanaşmaların yayılarak yerləşməsidir. İnsanlar fərdi azadlıq və şəxsi zövqləri ictimai norma və öhdəliklərdən üstün tutduqda, ailəni sabit sosial institut kimi deyil, müvəqqəti və elastik bir razılaşma kimi qəbul edirlər ki, bu, xoş olmayan, amma başa düşülən bir tendensiyadır.

Müasir insan həyatını əvvəlcədən yazılmış ssenarilər əsasında deyil, situativ və fərdi qərarlara uyğun qurur. Bu baxımdan ailə də artıq "məcburi struktur" kimi yox, istənilən vaxt ləğv edilə bilən bir müqavilə kimi görünür.

Digər mühüm faktor isə cinsəlliyin "outsourcing" edilməsidir. Porno sektoru, ifrat açıq-saçıqlığı normaya çevirən film, reklam və musiqi industriyaları qadın bədənini kişilər üçün əlçatan və adi bir predmetə çevirir. Sosial şəbəkələr isə qadınlara və kişilərə qarşı cinsi nümayiş imkanını genişləndirir. Nəticədə ər və arvad cinsəllik baxımından bir-birinə bağlı olmayaraq alternativ variantlardan asılı vəziyyətə düşür, ailənin ən vacib sütunlarından biri olan cinsəllik artıq ailənin monopoliyasından çıxır.

İqtisadi qeyri-sabitlik də ailənin təməllərini zəiflədən mühüm amillərdən biridir. Gəlirin qeyri-müəyyən olması, mənzil problemi və uzunmüddətli planların qurulmaması ailəni qoruyucu mexanizm olmamaqla yanaşı, bəzən əlavə stress mənbəyinə çevrilir. Belə şəraitdə insanlar ailəni təhlükəsizlik təminatçısı kimi deyil, əlavə məsuliyyət kimi görməyə başlayır.

Ümumilikdə, müasir ailə əbədi birlik ideyasından uzaqlaşaraq, daha çox son istifadə tarixi olan elastik bir müqaviləyə çevrilməkdədir.

Telegramda izləyin