Kaliforniyada 11 yaşlı oğlanın təyyarə idarə etməsi gündəm oldu

Kaliforniyada yaşayan 11 yaşlı uşağın təyyarə sükanı arxasına keçməsi sosial şəbəkə istifadəçilərinin heyrətinə səbəb olub.

Oxu.Az xəbər verir ki, bu barədə NDTV kanalı məlumat yayıb.

Yayılan videolarda 11 yaşlı Rişi Şarmanın kiçikölçülü təyyarənin pilot kabinəsində əyləşərək, mütəxəssis nəzarəti ilə idarəetmə sistemlərini peşəkarcasına tənzimlədiyi əks olunub. Şagird sərbəst şəkildə, heç bir çətinlik çəkmədən təyyarəni yerə endirir və yenidən havaya qaldırır.

Hələ yeddi yaşından aviasiya sahəsinə həvəs göstərən Rişi artıq bir neçə ildir ki, təlimatçılarla birlikdə praktik məşğələlərdə iştirak edir. Onun uçuşunu əks etdirən kadrlar izləyicilər tərəfindən rəğbətlə qarşılanıb, insanların bir qismi uşağın təmkinini və yüksək hazırlığını qeyd edərək, onun qabiliyyətini yetkin pilotların bacarıqları ilə bir tutub.

İnternet istifadəçiləri bu cür hallarda yaş senzi məsələsinə də toxunublar. Məlumdur ki, dünyanın əksər dövlətlərində kommersiya məqsədli pilot lisenziyasına sahib olmaq üçün qanuni olaraq yetkinlik yaşına çatmaq mütləqdir. Lakin uçuş məktəbləri və aviasiya klubları mütəmadi olaraq azyaşlılara ilkin hazırlıq kursları keçir, bu isə onlara peşəkarların ciddi müşayiəti ilə təyyarə idarəetməsinin təməl prinsiplərinə yiyələnmək şansı verir.

Telegramda izləyin