Bakıda bu ərazilərdə SÖKÜNTÜ OLACAQ - Metrostansiya, tramvay xətləri...

"Plan üzrə əvvəldən elan olunmuş rayonlar qüvvədə qalır. 2026-cı ildə "Təzəpir" məscidinin ətrafı, "Bayıl şəhər" adlandırılan ərazilər, keçmiş "Sovetski" (hazırda Yasamal rayonu) ərazisində yerləşən və artıq sökülmüş binaların qalıqlarını əhatə edən sahələr söküntü prosesinə cəlb olunacaq".

Bunu BAKU.WS-ə açıqlamasında Azərbaycan Qiymətləndiricilər Cəmiyyətinin (AQC) sədri Vüqar Oruc bildirib.

Onun sözlərinə görə, həmçinin yeni tikiləcək metro stansiyalarının ətrafı və tramvay xətlərinin keçəcəyi küçələr də bu prosesə daxil ediləcə:

"Xüsusilə Ceyhun Hacıbəyli küçəsi və 1 saylı xəstəxananın ətrafı, o cümlədən Salman Mümtaz, Xanlar Ələkbərov, Qanbay Vəzirov, Yusif Qasımov, Rzaquliyev, Nabat Aşurbəyova, Çingiz Mustafayev və Mirzəağa Əliyev küçələrinin 2026-cı ildə və sonrakı illərdə mərhələli şəkildə söküntüyə məruz qalacağı gözlənilir. Nərimanov rayonunda isə Montin və Keşlə bazarı ətrafı ərazilər bu prosesə cəlb olunacaq".

Bundan əlavə, artıq Azərbaycanın bir çox rayon və kəndlərində də analoji proseslər aparılır. Qəzalı binalar müəyyənləşdirilmiş və onların mərhələli şəkildə sökülməsi planlaşdırılmışdır".

AQC sədri əlavə edib ki, bu proses bütövlükdə ölkəni əhatə edəcək:

"Lakin 2026-cı ildə həyata keçiriləcək işlər dövlət büdcəsinin və investorların maliyyə imkanlarından asılı olacaq. Əgər söküntü prosesi Bakı şəhərinin 2040-cı il Baş Planına uyğun şəkildə aparılaraq həmin ərazilərdə parklar və ya ictimai məkanlar salınarsa, vətəndaşlara dövlət büdcəsi hesabına kompensasiya ödəniləcək.

Əgər sökülən ərazilərdə müvafiq tikinti şirkətləri (MTK-lar) tərəfindən yeni binalar inşa olunarsa, bu halda vətəndaşlara həmin binalarda yeni mənzillər təqdim ediləcək. Yəni ümumilikdə bu proses həm investorların cəlb olunmasından, həm də dövlət büdcəsinin imkanlarından birbaşa asılıdır".

Telegramda izləyin