İnsan özünü aldatdığını necə başa düşə bilər? - AÇIQLAMA

İnsan bəzən özünü qorumaq üçün reallığı olduğu kimi qəbul etməkdən qaçır və fərqinə varmadan özünü aldatmağa başlayır.

Bu hal qısa müddətdə rahatlıq versə də, uzun müddətdə həm emosional gərginlik yaradır, həm də yanlış qərarların artmasına səbəb olur.

Bəs görəsən insan özünü aldatdığını necə başa düşə bilər?

Psixoloq Gülsər Qədirli Sonxeber.az -a mövzu ilə bağlı açıqlama verib:

"İnsanın özünü aldatdığını anlaması üçün ilk növbədə daxili ziddiyyətlərinə diqqət yetirməsi vacibdir. Əgər bir insan "hər şey qaydasındadır" desə də, daxilində narahatlıq, gərginlik və ya izah edə bilmədiyi sıxıntı hiss edirsə, bu, özünü aldatmanın əsas siqnallarından biri ola bilər.

Digər mühüm əlamətlərdən biri davranışlarla düşüncələr arasındakı uyğunsuzluqdur. Məsələn, insan bir münasibətdə xoşbəxt olduğunu iddia edir, amma davamlı olaraq özünü yorğun, əsəbi və ya dəyərsiz hiss edirsə, bu artıq daxili həqiqətin fərqli olduğunu göstərir.

Həmçinin insan tez-tez öz davranışlarına bəraət qazandırmağa çalışırsa, reallığı dəyişdirmək əvəzinə onu yumuşaldırsa, bu da özünü aldatma mexanizminin işə düşdüyünü göstərə bilər. Belə hallarda insan faktlara deyil, özünü rahat hiss etdirən izahlara üstünlük verir.

Özünü aldatmanı anlamağın yolu səmimi özünüdərkdən keçir. İnsan özünə çətin suallar verməli, hisslərini inkar etmək əvəzinə qəbul etməli və davranışlarının arxasında duran real səbəblərlə üzləşməyi bacarmalıdır. Bu, bəzən narahatlıq yaratsa da, uzunmüddətli psixoloji sağlamlıq üçün vacib addımdır"

Telegramda izləyin