Borc müqavilələrində gizli və ya anlaşılmaz maddələrə rast gələn şəxs hansı hüquqi proseduru izləməlidir? - AÇIQLAMA

Hər il minlərlə vətəndaş borc müqavilələrində anlaşılmaz və ya gizli maddələrlə qarşılaşır.

Bu maddələr tez-tez şəxsin hüquqlarını məhdudlaşdıra və sonradan ciddi maliyyə və hüquqi problemlər yarada bilər.

Bəs borc müqavilələrində gizli və ya anlaşılmaz maddələrə rast gələn şəxs hansı hüquqi proseduru izləməlidir?

Hüquqşünas Xanım Yusifova bu barədə Sonxeber.az -a açıqlama verib:

"Borc müqaviləsində şübhəli və ya anlaşılmaz maddələr aşkarlanarsa, vətəndaş ilk növbədə müqaviləni tam şəkildə oxumalı və bütün maddələrin Azərbaycan Respublikasının Mülki Məcəlləsinə uyğun olub-olmadığını qiymətləndirməlidir. Əgər maddələr qanuna zidd və ya qeyri-müəyyəndirsə, bu, həmin maddələrin etibarsız sayılması üçün əsas ola bilər.

Vətəndaş müqaviləni təqdim edən tərəfə yazılı sorğu göndərərək anlaşılmaz maddələrin izahını tələb etməlidir. Bu addım həm hüquqi sübut, həm də gələcəkdə mübahisələrin həlli üçün önəmli sənəd rolunu oynayır.

Hüquqi məsləhət almaq vacibdir. Təcrübəli hüquqşünas maddələrin qanuniliyini qiymətləndirə, riskləri müəyyənləşdirə və lazım gələrsə, məhkəməyə müraciət etməyi tövsiyə edə bilər. Mülki Məcəlləyə görə, hüquqa zidd şərtlər müqavilənin tam və ya qismən etibarsız sayılmasına gətirib çıxara bilər.

Bütün sənədlərin, müqavilə surətlərinin və yazışmaların toplanması və saxlanması vacibdir. Bu, yalnız hüquqların qorunması üçün deyil, həm də gələcəkdə yaranacaq mübahisələrdə vətəndaşın müdafiəsi üçün əsaslı sübut kimi istifadə edilə bilər"

Telegramda izləyin