"Təmtəraq insanın dəyərini müəyyən etmir" - AÇIQLAMA

"Yasların və toyların təmtəraqlı keçirilməsi zaman-zaman gündəmdə olub. Bu məsələ ilə bağlı iki fərqli baxış mövcuddur".

Bunu Sonxeber.az-a Sosioloq Mail Yaqub danışıb.

O, açıqlamasında qeyd edib ki, cəmiyyətdə müəyyən balans yaradılmalıdır:

"Birinci yanaşmaya görə, azad bazar şəraitində insanlar sərbəst seçim edə bilir və istədikləri kimi toylarını, yaslarını keçirə, eyni zamanda istədikləri kimi alış-veriş edə bilərlər. Bu sahəyə inzibati müdaxilə etmək doğru sayılmır və insanların necə yaşamaq istədiyinə qarışılmamalıdır.

İkinci yanaşma isə belədir ki, burada ədalət prinsipi pozulur. Belə ki, maddi imkanı yaxşı olan şəxslər təmtəraqlı toy, yas və digər mərasimlər keçirir. Bu isə bir tərəfdən israfa yol açır, digər tərəfdən isə sosial ədalətsizlik yaradır. Çünki daha az imkana sahib olan insanlar bunu edə bilmir və nəticədə özlərini "əzgin" hiss edə bilirlər. İmkanı olanların bu cür təmtərağı dəbə çevirməsi digərlərini də həmin səviyyəyə çatmaq üçün borca, xərclərə və kreditə girməyə sövq edir. Bu isə cəmiyyətdə disbalans yaradır.

Mən ikinci yanaşmanı dəstəkləyirəm. Hesab edirəm ki, cəmiyyətdə müəyyən balans yaradılmalıdır. Təbliğ olunmalıdır ki, təmtəraqlı toy, ad günü, yas və digər mərasimlərin keçirilməsi insanın dəyərini müəyyən etmir. İnsanı dəyərli edən başqa faktorlardır".

Vüsalə İbrahimli

Telegramda izləyin