"Bu tendensiyanın güclənməsində sosial medianın rolunu da ayrıca qeyd etməyi unutmamalıyıq" - AÇIQLAMA

Son illərdə cəmiyyətdə müxtəlif mərasimlərin, yəni, "40 çıxartma", cinsiyyət tapma, sünnət və ad günlərinin daha təmtəraqlı və dəbdəbəli şəkildə keçirilməsi diqqət çəkir. Bu hallar getdikcə daha geniş yayılır və müəyyən sosial tendensiyaya çevrilir. "40 çıxartma", "cinsiyyət tapma", sünnət, ad günü kimi tədbirlərin günü-gündən daha təmtəraqlı keçirilməsinin başlıca səbəbi nədir?

Mövzu ilə bağlı Sonxeber.az-a sosioloq Yusif Nəbiyev danışıb.

O, açıqlamasında qeyd edib ki, son illərdə mərasimlərin daha təmtəraqlı keçirilməsi, əslində, cəmiyyətin "göstəriş iqtisadiyyatı"na keçidinin nəticəsidir:

"İnsanlar artıq sadəcə qeyd etmək yox, göstərmək istəyirlər. Və öz sosial statuslarını nümayiş etdirmək üçün dəbdəbə və göstərişə daha çox pul xərcləməyə meyl edirlər. Yəni məsələ uşağın 40 mərasimini keçirmək, uşaq üçün unudulmaz anlar təşkil etmək yox, bunu kənara göstərməkdir.

Bu tendensiyanın güclənməsində sosial medianın rolunu da ayrıca qeyd etməyi unutmamalıyıq. Əvvəllər mərasimlər məhəllə və qohumların çevrəsində qalırdısa, indi onlar ictimai performansa çevrilib. E.Goffmanın dediyi kimi, insanların gündəlik həyatları teatrlaşıb. Səhnələşib. Hər mərasim bir şou, bir tamaşaya çevrilib. Bunun nəticəsidir ki, indi artıq sadə tədbir və məclislər belə hansısa xəyali bir "minimal standart"ın üstündə olsun deyə cəhd edilir. Yersiz yerə şişirdilir.

Burada bir nüansı vurğulamaq istəyirəm ki, əksər məclislərin əksinə, sünnət toylarımız getdikcə daha az və daha kiçik miqyasda qeyd olunmağa başlayıb. Bir çox ailələr öz oğul övladları üçün sünnət toyu etməməyə başlayıblar. Bu göstərir ki, bütün mərasimlərimizdəki dəyişim eyni istiqamətdə getmir. Bəzi ənənəvi mərasimlər ya iqtisadi səbəblərlə, ya da mədəni prioritetlərin dəyişməsi ilə əvvəlki əhəmiyyətini itirir. Maraqlıdır ki, bir tərəfdə cinsiyyət tapma partiləri çoxalır, amma digər tərəfdə klassik sünnət toyu yavaş-yavaş sıradan çıxır. Bu da cəmiyyətin hansı dəyərləri önə çıxardığını açıq göstərir".

Vüsalə İbrahimli

Telegramda izləyin