"Azərbaycan-Litva münasibətlərində müşahidə olunan dinamika ölkəmizin beynəlxalq arenada artan nüfuzunun bariz göstəricisidir" - AÇIQLAMA

Azərbaycan və Litva energetika, kənd təsərrüfatı, müdafiə və təhsil sahələrində əməkdaşlığın inkişafı üçün böyük potensiala malikdir.

Bu barədə "Report"a müsahibəsində Litvanın Baş naziri İnqa Ruqiniene bildirib.

"Dünən kifayət qədər dolğun gün oldu: Prezident İlham Əliyev və Baş nazir Əli Əsədovla görüşlərdə ciddi müzakirələr apardıq. Bu gün xarici işlər naziri Ceyhun Bayramovla görüşüm planlaşdırılıb. Şadam ki, (dünənki görüşlərdə) çoxlu ortaq nöqtələr tapdıq və müdafiə, təhsil və digər sahələrdə əməkdaşlığı inkişaf etdirmək üçün imkanlar gördük. Biz, həmçinin kənd təsərrüfatı və energetika sektorunun gücləndirilməsi imkanlarını da müzakirə etdik", - o bildirib.

Baş nazir əlavə edib ki, Azərbaycan Avropaya enerji resurslarının etibarlı tədarükü üçün səy göstərir.

"Azərbaycan-Litva münasibətlərində müşahidə olunan dinamika ölkəmizin beynəlxalq arenada artan nüfuzunun və strateji əhəmiyyətinin bariz göstəricisidir", - bunu Sonxeber.az -a açıqlama verən politoloq Tural İsmayılov deyib:

"İnqa Ruqiniene-nin səsləndirdiyi fikirlər də təsdiq edir ki, Azərbaycan artıq regionda deyil, daha geniş coğrafiyada etibarlı və vacib tərəfdaş kimi qəbul olunur.

Energetika sahəsində Azərbaycanın rolu xüsusilə qürurvericidir. Bu gün ölkəmiz Avropa İttifaqı üçün sabit və təhlükəsiz enerji mənbəyi kimi çıxış edir. Prezident İlham Əliyev-in rəhbərliyi ilə həyata keçirilən uğurlu enerji strategiyası nəticəsində Azərbaycan Avropanın enerji xəritəsində açar ölkələrdən birinə çevrilib. Bu, təkcə iqtisadi deyil, həm də siyasi gücümüzün artmasının mühüm göstəricisidir.

Kənd təsərrüfatı sahəsində də Azərbaycanın böyük potensialı diqqət mərkəzindədir. Ölkəmizin zəngin təbii resursları və aqrar ənənələri beynəlxalq tərəfdaşlar üçün cəlbedici əməkdaşlıq imkanları yaradır. Litva kimi Avropa ölkələrinin bu sahədə əməkdaşlığa maraq göstərməsi Azərbaycanın kənd təsərrüfatında artan rolunun təsdiqidir.

Müdafiə sahəsində isə Azərbaycan son illərdə güclü və modern ordu quruculuğu ilə regionda lider mövqeyə yüksəlib. Bu istiqamətdə əldə olunan uğurlar ölkəmizi təhlükəsizlik sahəsində də etibarlı tərəfdaş kimi ön plana çıxarır. Baltik ölkələrinin Azərbaycanla əməkdaşlığa maraq göstərməsi bu reallığın beynəlxalq səviyyədə qəbul olunduğunu göstərir.

Təhsil sahəsində əməkdaşlıq isə Azərbaycanın intellektual potensialının gücləndirilməsi baxımından xüsusi əhəmiyyət daşıyır. Gənclərimizin beynəlxalq təcrübə qazanması, akademik əlaqələrin genişlənməsi ölkəmizin gələcək inkişaf strategiyasına xidmət edir. Bu kontekstdə Ceyhun Bayramov ilə keçirilən görüşlər də əməkdaşlığın dərinləşdirilməsi üçün mühüm platforma rolunu oynayır.

Baş nazir Əli Əsədov ilə aparılan müzakirələr isə göstərir ki, Azərbaycan bu əməkdaşlıqlara sistemli və məqsədyönlü yanaşır. Bakı artıq təşəbbüs göstərən, regional və qlobal layihələr irəli sürən aktiv aktora çevrilib.

Bütün bunların fonunda aydın görünür ki, Azərbaycan bu gün yalnız öz maraqlarını qoruyan deyil, eyni zamanda tərəfdaşlarına dəyər qatan, sabitlik və inkişaf ixrac edən güclü dövlətdir. Azərbaycan-Litva əməkdaşlığının genişlənməsi də məhz bu reallığın məntiqi nəticəsi kimi çıxış edir".

Telegramda izləyin