Təhsildə böyük dəyişikliklərin ANONSU - Hansı addımlar atılmalıdır?

Elm və təhsil naziri Emin Əmrullayev Dövlət İmtahan Mərkəzinin yaradılmasının 10 illik yubileyi münasibətilə keçirilən "Qiymətləndirmə Sistemləri: Etimad, Şəffaflıq və İnnovasiya" mövzusunda beynəlxalq elmi-praktik konfransda bildirib ki, repetitorluq sistemi oxuyub-anlama bacarıqlarına mane olur. O deyib ki, oxuyub-anlama bacarıqları Azərbaycan təhsil sisteminin ən həssas və inkişaf etdirilməli istiqamətlərindən biridir.

Nazir əlavə edib ki, bu islahatlardan sonra ola bilər ki, nəticələr ilkin mərhələdə düşsün, suallar çətin görünsün və ya insanlarda geriləmə təəssüratı yaransın. Lakin bu, reallığın ölçülməsi baxımından vacibdir. Çünki uzunmüddətli perspektivdə oxuyub-anlama bacarıqları hər bir şəxsin peşəkar inkişafında həlledici rol oynayır.

Məsələ ilə bağlı Oxu.Az-a danışan Milli Məclisin Elm və təhsil komitəsinin üzvü Ceyhun Məmmədov bildirib ki, repetitorluq fəaliyyəti Azərbaycan təhsilinin ən ciddi problemlərindəndir.

O vurğulayıb ki, bununla bağlı ciddi addımlar atılmalıdır:

"Bunun ləğvi ilə bağlı həm təbliğat, həm də inzibati yollara əl atmalıyıq. Repetitorluq təhsilimiz üçün ciddi problemlər yaradır. İslahatların əsas məqsədi bu sahənin qarşısını almaq olmalıdır. Həmçinin düşünməliyik ki, islahatlar bizə hansı nəticəni verəcək. Bundan başqa, "Azərbaycanlıların bəziləri oxuduğunu anlaya bilmir" kimi fikirlər tez-tez səsləndirilir. Bu, Azərbaycan təhsilinin qlobal problemi deyil. Düşünmürəm ki, xalqımız oxuduğunu anlamır. Belə insanlar dünyanın hər yerində var. Amma bunu ümumiləşdirmək olmaz. Baxın, təhsilimizdə müəyyən islahatlar gedir. Bu, özünü müxtəlif sahələrdə göstərir. Məsələn, peşə təhsilində yeniliklər aparılır, müəssisələr tikilir, agentliklər yaradılır, əlavə vəsait ayrılır".

C.Məmmədov vurğulayıb ki, təhsildə daha geniş islahatlar aparılmalıdır:

"Geniş imkanlarla daha böyük islahatlar aparılmalıdır. Əvvəllər Elm və Təhsil Nazirliyinə bu qədər imkanlar verilməmişdi. Hər biri az qala ayrı-ayrılıqda nazirliyə bərabərdir. İmkanlardan daha səmərəli istifadə etməliyik. Ciddi və sürətli addımlar atılmalıdır. Olduqca yeni çağırışlar var. Ali təhsil sahəsi daha praktik olmalıdır. Universitetlərin islahatlara ehtiyacı var. Müəllimlərin maaşı artırılmalı, rifahı yaxşılaşdırılmalıdır. Əks halda gecikəcəyik və bundan əziyyət çəkəcəyik".

Telegramda izləyin