Uşağın qəyyumluğu hansı meyarlar əsasında müəyyən edilir? - AÇIQLAMA

Ailə münasibətlərində ən həssas və mübahisəli məsələlərdən biri uşağın kimlə qalması, yəni qəyyumluğun müəyyən edilməsidir.

Boşanma və ya valideynlər arasında yaranan fikir ayrılıqları zamanı məhkəmənin əsas məqsədi valideynlərdən hansının haqlı olması deyil, uşağın mənafeyinin maksimum dərəcədə qorunmasıdır.

Bəs görəsən uşağın qəyyumluğu hansı meyarlar əsasında müəyyən edilir?

Hüquqşünas Xanım Yusifova bu barədə Sonxeber.az -a açıqlama verib:

"Azərbaycan qanunvericiliyinə əsasən uşağın qəyyumluğu müəyyən edilərkən bir sıra vacib meyarlar nəzərə alınır.

İlk növbədə, uşağın mənafeyi əsas prinsip kimi götürülür. Məhkəmə qərar verərkən uşağın fiziki, psixoloji və mənəvi inkişafını daha yaxşı təmin edəcək valideyni müəyyən etməyə çalışır.

Digər mühüm məsələlərdən biri valideynlərin şəxsi keyfiyyətləri və həyat tərzidir. Buraya onların davranışı, sosial mühiti, zərərli vərdişlərinin olub-olmaması və uşağa münasibəti daxildir.

Maddi və yaşayış şəraiti də nəzərə alınan amillər sırasındadır. Amma bu, təkbaşına həlledici faktor sayılmır. Yəni daha yaxşı maddi imkana malik olmaq avtomatik olaraq qəyyumluğun həmin valideynə verilməsi demək deyil.

Eyni zamanda, valideynlərin uşağa ayıra biləcəyi vaxt və qayğı xüsusi əhəmiyyət daşıyır. Uşağın gündəlik tərbiyəsi, təhsili və sağlamlığı ilə daha çox məşğul olan valideyn üstün hesab oluna bilər.

Qanunvericiliyə görə, uşağın yaşı və onun fikri də nəzərə alınır. Müəyyən yaş həddinə çatmış uşağın kiminlə qalmaq istədiyi məhkəmə tərəfindən öyrənilir və qiymətləndirilir.

Həmçinin, bacı-qardaşların ayrılmaması prinsipi də mümkün qədər qorunur. Yəni məhkəmələr adətən uşaqların bir-birindən ayrı düşməməsinə üstünlük verir.

Hər bir iş fərdi qaydada araşdırılır və bütün bu meyarlar kompleks şəkildə qiymətləndirilir. Əsas məqsəd isə uşağın təhlükəsiz, sağlam və sabit mühitdə böyüməsini təmin etməkdir".

Telegramda izləyin