Dronla çobanlıq: Qoyun sürüsünü 30 saniyəyə toplandı - VİDEO

Türkiyənin Erzurum vilayətinin Oltu rayonunda maraqlı hadisə qeydə alınıb.

Sonxeber.az türk mediasına istinadən xəbər verir ki, çobanlıqla məşğul olan İsmail Akbaş müasir texnologiyadan istifadə edərək dağılmış qoyun sürüsünü cəmi 30 saniyə ərzində bir araya gətirib.

Oltunun Toprakkale kəndində çalışan Akbaş çay dəmlədiyi vaxt sürünün geniş əraziyə yayıldığını görüb. Sürünü piyada toplamaq əvəzinə, üzərinə zəng bağladığı dronu havaya qaldıraraq qoyunları istiqamətləndirib və qısa müddətdə yenidən bir yerə yığıb.

Hadisəni sosial media hesabında paylaşan çoban bildirib ki, texnologiyadan istifadə onun işini xeyli asanlaşdırır: "Çayım qaynayırdı, qoyunlar da dağılmışdı. Düşündüm ki, dronu göndərim. Əgər dron olmasaydı, özüm getməli idim. 30 saniyəyə işi həll etdim".

Akbaş qeyd edib ki, çobanlıq ata-baba peşəsidir və əvvəllər sürü əsasən səs və çomaq vasitəsilə idarə olunurdu. Onun sözlərinə görə, dron vasitəsilə sürünü daha rahat izləmək və yönləndirmək mümkündür: "İndi Oltu dağlarında sanki quş kimi hər şeyi yuxarıdan görürəm. Sürü dağılanda dronla tapıb geri qaytarıram".

"Yeni nəsil çoban" kimi təqdim olunan Akbaşın bu üsulu sosial şəbəkələrdə böyük maraq doğurub və texnologiyanın kənd təsərrüfatında tətbiqinə nümunə kimi qiymətləndirilib.

Telegramda izləyin