18 yaşlı qız əlil arabasında olduğu üçün getdiyi məkana buraxılmadı

Mançester şəhərində baş verən hadisə əlilliyi olan şəxslərin ictimai məkanlara çıxışı ilə bağlı müzakirələri yenidən gündəmə gətirib.

Sonxeber.az xarici mediaya istinadən xəbər verir ki, 18 yaşlı Maddie Haining dostları ilə birlikdə "Canal Street"də "Club Tropicana" adlı məkana daxil olduqdan cəmi bir neçə dəqiqə sonra mühafizəçilər tərəfindən çölə çıxarıldığını deyib. O, yerli mediaya açıqlamasında yaşadıqlarını "insanlıqdan kənar davranış" kimi qiymətləndirib.

Sosial mediada yayılan görüntülərdə iki əməkdaşın gənc qadına yaxınlaşaraq onunla danışdığı əks olunur. Maddie bildirib ki, əməkdaşlardan biri nəzakətli davransa da, müəssisə rəhbərinin davranışı "kobud və qəbuledilməz" olub.

Kadrlarda onun "əlil arabasında olduğum üçün məkanı tərk etməyə məcbur edilirəm" dediyi eşidilir. Gənc qadının sözlərinə görə, obyekt rəhbərliyi mümkün yanğın təhlükəsizliyi pozuntusu halında tətbiq ediləcək cərimənin onun adına yazılacağını bildirib, o isə buna etiraz edib.

Maddie əlavə edib ki, hadisə zamanı əməkdaşlara "Equality Act 2010" qanununu xatırladaraq əlillərin xidmətlərə çıxışının məhdudlaşdırıla bilməyəcəyini bildirib. Buna baxmayaraq, işçilərin israrla məkanı tərk etməsini tələb etdiyini deyib. O qeyd edib ki, əvvəlcə heç bir problem olmadan içəri daxil olsa da, sonradan "təhlükəsizlik riski", daha sonra isə "yanğın riski" əsas gətirilərək çıxarılıb.

Hadisə ilə bağlı paylaşdığı video qısa müddətdə geniş yayılıb, minlərlə bəyənmə və yüzlərlə rəy toplayıb. İstifadəçilərin əksəriyyəti baş verənlərə etirazını bildirib.

Gənc qadın bildirib ki, hadisədən sonra məkanın idarəedici şirkətinin nümayəndələri ilə əlaqə saxlayıb və ona məsələ ilə bağlı daxili araşdırmanın başladıldığı bildirilib.

Gecə klubunun rəhbərliyi isə yerli mətbuata açıqlamasında faktın araşdırıldığını qeyd edərək, hələlik əlavə şərh verməkdən imtina edib.

Telegramda izləyin