19 illik müəllim video çəkib üsyan etdi - VİDEO

Şanlıurfa və Kahramanmaraşda baş verən məktəb hücumlarından sonra sosial mediada yayılan video təhsil mühitindəki narahatlığı bir daha gündəmə gətirib.

Sonxeber.az türk mediasına istinadən xəbər verir ki, videoda çıxış edən 19 illik ibtidai sinif müəllimi belə bir dövrü peşə fəaliyyəti ərzində ilk dəfə yaşadığını bildirib.

Müəllim qeyd edib ki, baş verən hadisələr həm şagirdlər, həm də müəllimlər üçün ciddi psixoloji sarsıntı yaradıb. Onun sözlərinə görə, məktəbdə bəzi şagirdlərin qorxu və panika içində pəncərədən tullanmağa çalışdığı anlara şahid olmaq olduqca ağır olub: "19 ildir ibtidai sinif müəllimiyəm. Bu cür dövrü nə biz, nə də bizdən əvvəlkilər yaşayıb. O uşaqların pəncərədən aşağı atılmağa çalışdığını gördükcə ürəyim parçalandı. Əminəm ki, bütün müəllimlər eyni hissləri yaşadı".

Müəllimlərə daha geniş səlahiyyətlərin verilməsinin vacibliyini vurğulayan təhsil işçisi bildirib ki, şagirdlərdə və ailələrdə mövcud problemlər erkən mərhələdə hiss olunsa da, çox vaxt lazımi müdaxilə mümkün olmur. O qeyd edib ki, müəllimlər həm uşaqlardakı, həm də valideynlərdəki davranış problemlərini əvvəlcədən sezə bilirlər, lakin bu barədə etdikləri xəbərdarlıqlar çox vaxt nəzərə alınmır.

Valideynlərlə ünsiyyətin çətinliyinə də toxunan müəllim bildirib ki, bir çox hallarda valideynlər övladları ilə bağlı tənqidi yanaşmanı qəbul etmir: "Biz nəsə dedikdə, demək olar ki, heç kim öz övladında problem görmək istəmir".

Ardıcıl baş verən məktəb hücumlarından sonra yayılan bu video müəllimlərin sahədə qarşılaşdığı reallıqları və təhsil sistemindəki boşluqları yenidən müzakirə mövzusuna çevirib.

Telegramda izləyin