Vətəndaş hansı halda inzibati cərimələrə etiraz edə bilər? - AÇIQLAMA

İnzibati cərimələrlə bağlı narazılıqlar cəmiyyətdə ən çox rast gəlinən hüquqi məsələlərdən biridir.

Xüsusilə yol hərəkəti qaydalarının pozulması, ictimai asayişlə bağlı cərimələr və ya müxtəlif inzibati xətalara görə tətbiq olunan sanksiyalar zamanı vətəndaşlar tez-tez qərarın ədalətli olub-olmaması ilə bağlı suallar yaşayırlar.

Bəs görəsən vətəndaş hansı halda inzibati cərimələrə etiraz edə bilər?

Hüquqşünas Xanım Yusifova bu barədə Sonxeber.az -a açıqlama verib:

"İnzibati cərimələrə etiraz etmək mümkündür və bu, hər bir vətəndaşın qanunla qorunan hüquqlarından biridir. Əgər şəxs hesab edirsə ki, ona tətbiq olunan cərimə əsassızdır və ya qanunvericiliyin tələblərinə uyğun deyil, o, həmin qərardan şikayət verə bilər.

İlk növbədə qeyd etmək lazımdır ki, inzibati xəta haqqında qərar təqdim edildikdən sonra müəyyən edilmiş müddət ərzində, yəni, adətən 10 gün ərzində şikayət vermək hüququ var. Bu müddət ötürüldükdə şikayətin təmin olunması çətinləşə bilər, lakin üzrlü səbəblər olduqda müddətin bərpası mümkündür.

Şikayət iki qaydada verilə bilər: Qərarı çıxaran orqana - məsələn, yol polisi və ya digər inzibati qurum və ya birbaşa məhkəməyə

Praktik baxımdan daha effektiv yol çox vaxt birbaşa məhkəməyə müraciət etmək hesab olunur, çünki bu halda işə müstəqil instansiya tərəfindən baxılır.

Etiraz zamanı vətəndaş öz mövqeyini əsaslandırmalı, mümkün sübutları təqdim etməlidir. Bu sübutlara video və foto materiallar, şahid ifadələri və ya digər sənədlər daxil ola bilər. Əgər cərimə texniki vasitələrlə (məsələn, radar və ya kamera) qeydə alınıbsa, həmin görüntülərin dəqiqliyi və qanunauyğunluğu da mübahisələndirilə bilər.

İnzibati cəriməyə etiraz etmək hüququnun istifadə edilməsi vətəndaşın hüquqi savadlılığının göstəricisidir və bu proses düzgün aparıldıqda ədalətli nəticə əldə etmək mümkündür".

Telegramda izləyin