"Heç bir qadın həyatında həddindən artıq nazlı kişi obrazını ideal kimi görmür" - AÇIQLAMA

Son dövrlərdə sosial müzakirələrdə tez-tez səslənən mövzulardan biri də qadınların öz aralarında kişilər haqqında danışarkən bir-birinə psixoloji təsir göstərib-göstərməməsidir.

Bəziləri hesab edir ki, bu cür söhbətlər qadınlar arasında mənfi düşüncələri artırır, digərləri isə bunun sadəcə müşahidələrin paylaşılması olduğunu deyir.

Bəs görəsən reallıq nəyi deyir?

Sosioloq Mətanət Məmmədova bu barədə Sonxeber.az -a açıqlama verib:

"Qadınlar, adətən, gördüklərini və yaşadıqlarını bölüşürlər. Bu səbəbdən onları bu mövzuda günahlandırmaq doğru yanaşma deyil. Heç bir qadın həyatında zəif xarakterli, həddindən artıq nazlı və məsuliyyətdən qaçan bir kişi obrazını ideal kimi görmür.

Son illərdə bəzi qadınların kişilərdə davranış və xarakter dəyişiklikləri müşahidə etdiyini deməsi təəccüblü deyil. Onlar bu dəyişiklikləri öz aralarında müzakirə edirlər. Bu cür söhbətləri "bir-birini qızışdırmaq" kimi qiymətləndirmək doğru olmaz. Əksinə, bu, şəxsi təcrübələrin paylaşılmasıdır.

Bu müzakirələrin qadınların psixologiyasına mənfi təsir göstərdiyini demək də birmənalı deyil. Əsas narahatlıq yaradan məqam kimi isə bəzi qadınlar tərəfindən kişilərin ənənəvi rol və məsuliyyətlərdən uzaqlaşması göstərilir. Məhz bu dəyişikliklər daha çox diqqət çəkir və müzakirə mövzusuna çevrilir".

Telegramda izləyin