Süni intellekt insanın hiss etmə qabiliyyətini zəiflədir? - AÇIQLAMA

İnsanların duyğuları artıq yalnız üz-üzə münasibətlərdə deyil, ekranların arxasında da formalaşır.

Mesajlaşmalar, sosial şəbəkələr, avtomatik cavablar və süni intellektlə ünsiyyət gündəlik həyatın bir parçasına çevrilib.

Bu dəyişiklik isə haqlı bir sualı ortaya çıxarır: süni intellekt insanın hiss etmə qabiliyyətini zəiflədir, yoxsa sadəcə onu fərqli istiqamətə yönəldir?

Psixoloq Gülsər Qədirli bu barədə Sonxeber.az -a açıqlama verib:

"Süni intellektin özü birbaşa olaraq duyğuları "korlaşdırmır". Amma onun istifadəsi insanın emosional təcrübəsini dolayı yolla dəyişə bilər. İnsan beyninin sağlam emosional inkişafı üçün real münasibətlərdə qarşılıqlı hiss etmə, empatiya və reaksiyaların paylaşılması vacibdir. Süni intellekt isə çox vaxt bu qarşılıqlı dinamikanı tam əvəz etmir. Cavab verir, amma hiss etmir, anlayır kimi görünür, amma yaşatmır. Məsələn, bir insan uzun müddət yalnız süni sistemlərlə ünsiyyətdə olarsa, qarşısındakı "reaksiyanın" emosional dərinliyini zamanla daha az tələb etməyə başlaya bilər. Bu isə real münasibətlərdə səbr, empatiya və emosional dözümlülüyün zəifləməsinə gətirib çıxara bilər. Yəni problem texnologiyada deyil, onun insan münasibətlərini əvəz etməsi riskindədir.

Digər tərəfdən, süni intellekt düzgün istifadə olunduqda əksinə, emosional maarifləndirməyə dəstək ola bilər. İnsanlar öz hisslərini daha yaxşı anlamaq, düşüncələrini strukturlaşdırmaq və psixoloji dəstək almaq üçün bu vasitələrdən yararlana bilirlər. Amma burada əsas şərt balansdır.

Qısaca, süni intellekt duyğuları korlaşdıran bir faktor deyil, amma emosional əlaqələrin yerini tutduğu zaman insanın hiss etmə dərinliyini zəiflədə bilən bir vasitəyə çevrilə bilər".

Telegramda izləyin