Məktəbdə qətliam törədən İsanın sinif yoldaşı: "Qələmlə qolunu deşirdi" - VİDEO

Türkiyənin Kahramanmaraş şəhərində məktəbdə baş verən və 9 nəfərin həyatına son qoyan silahlı hücumla bağlı yeni detallar ortaya çıxıb.

Sonxeber.az türk mediasına istinadən xəbər verir ki, hadisəni törədən İsa Aras Mersinli-nin sinif yoldaşı G.İ. onun məktəbdə sərgilədiyi davranışlar barədə diqqətçəkən açıqlamalar verib.

G.İ. bildirib ki, Mersinli uzun müddətdir psixoloji problemlər yaşayırmış və dərs zamanı qeyri-adi hərəkətlər edirmiş. Onun sözlərinə görə, o, dərsdə kədərləndikdə özünə zərər verirmiş: "Bir şeyə üzüləndə qələmlə əlini, qolunu deşirdi, partası qan içində qalırdı. Hətta çantası belə qana bulaşırdı. Özünü boğmağa çalışırdı. Beşinci sinifdə çantasını boğazına dolayaraq özünü boğmuşdu"

Sinif yoldaşı həmçinin qeyd edib ki, Mersinlinin demək olar dostu olmayıb və tez-tez gecələr internetdə vaxt keçirdiyi üçün dərslərdə yuxulu vəziyyətdə olurmuş. Bəzən dərs zamanı səbəbsiz ağladığı, müəllimlərin isə onu məktəbin psixoloquna yönləndirdiyi bildirilir.

G.İ.-nin sözlərinə görə, Mersinli daha əvvəl iki sinif yoldaşına məktəbə silahlı hücum edəcəyini dediyini bildirib, lakin bu sözlər ciddi qəbul edilməyib.

Qeyd edək ki, İsa Aras Mersinli atasına məxsus silahlarla məktəbə daxil olaraq 8 şagird və 1 müəllimi qətlə yetirib. Hadisənin baş verdiyi məktəbə çoxsaylı vətəndaşlar axın edərək həyatını itirənlərin xatirəsini anır, əraziyə güllər və qeydlər qoyurlar.

Telegramda izləyin