"Bu barədə nə qədər maarifləndirməyə çalışsaq da, kənd adamı elə kənd adamı olaraq qalır" - PSİXOLOQ

Bu gün Ucar rayonunda yetkinlik yaşına çatmayan şəxsin uşaq dünyaya gətirməsi ilə bağlı yayılan məlumat cəmiyyətdə ciddi müzakirələrə səbəb olub. Hadisə erkən hamiləlik, yeniyetmələrin psixoloji durumu, ailədaxili nəzarət və uşaqların müdafiəsi məsələlərini yenidən gündəmə gətirib. Bu kimi halların azyaşlının psixoloji vəziyyətinə və gələcək inkişafına təsiri xüsusi diqqət çəkən məqamlardandır.

Bəs, yetkinlik yaşına çatmayan şəxsin bu cür ağır həyat hadisəsi ilə üzləşməsi onun psixologiyasında hansı travmalara səbəb ola bilər və bu travmalar gələcək davranışlarına necə təsir göstərə bilər?

Mövzu ilə bağlı Sonxeber.az-a psixoloq Samirə Bağırova danışıb.

O, açıqlamasında qeyd edib ki, yeniyetmə bir qızın uşaq dünyaya gətirməsinin psixoloji nəticələri məcburi məsuliyyət, öz ehtiyaclarını sıxışdırmaq, həyat planlarının yarımçıq qalması, güvən problemləri kimi məsələlərlə nəticələnə bilər:

"Bilirsiniz, dövran dəyişir, qaydalar da yenilənir. Bir zamanlar 30 yaşındakı qadın artıq yaşlı hesab olunurdusa, bu gün gənc qadın sayılır. Bir zamanlar ulu nənələrimiz hətta yeniyetmə yaşında ailə qururdularsa, bu gün bu, qanuna zidd hesab olunur. Çünki keçmişin şüur səviyyəsi aşağı idi, inkişaf yox idi. Bu gün isə sürətli inkişaf var, şüur artıq əvvəlki kimi deyil.

Əvvəllər normal qəbul olunan hadisələr bu günün müasir insanında travmalar yaradır. Yeniyetmə bir qızın uşaq dünyaya gətirməsinin psixoloji nəticələri nə ola bilər? Məcburi məsuliyyət, emosional yorğunluq, tükənmə, öz ehtiyaclarını sıxışdırmaq, həyat planlarının yarımçıq qalması, güvən problemləri. Uşaqla sağlam emosional bağ qurmaq çətinləşə bilər və nəticədə uşaqda da psixoloji travmalar yarana bilər.

Bilirsiniz, bu barədə nə qədər danışsaq, maarifləndirməyə çalışsaq da, bir az kobud səslənsə də, kənd adamı elə kənd adamı olaraq qalır. Çünki məlum məsələdir ki, şəhər və kənd arasında şüur kodlaşmaları fərqlidir. Bir cəmiyyəti qanunla, danışaraq, izah edərək başa salmaq mümkün olursa, digərini yalnız cəzalandıraraq qanunu qəbul etdirmək mümkün olur.

Yeniyetmə qızın uşaq dünyaya gətirməsi hallarında valideynlər və həyat yoldaşı 10 illik həbs ilə cəzalandırılsa, əmin olun ki, bu hallar təkrarlanmaz. Bizim ölkədə maariflənmə və inkişaf əsasən Bakı şəhərindədir. Qəsəbə və kəndlərin şüur kodlaşması isə sanki bir əsr öncədə qalıb".

Vüsalə İbrahimli

Telegramda izləyin