Yeniyetmələr niyə aqressivləşib? - AÇIQLAMA

Son dövrlərdə yeniyetmələr arasında aqressiv davranışların artması cəmiyyətdə narahatlıq doğuran mövzulardan birinə çevrilib.

Xüsusilə məktəblilər arasında müşahidə olunan qəddarlıq halları təkcə fərdi problem deyil, həm də ailə, təhsil mühiti və sosial faktorların birgə təsirinin nəticəsi kimi qiymətləndirilir.

Bəs görəsən bu dəyişimin arxasında hansı səbəblər durur?

Psixoloq Gülsər Qədirli bu barədə Sonxeber.az -a açıqlama verib:

"Yeniyetməlik dövrü psixoloji baxımdan ən həssas mərhələlərdən biridir. Bu dövrdə şəxsiyyət formalaşır, emosiyalar daha kəskin yaşanır və davranışlara nəzarət mexanizmi hələ tam oturuşmur. Aqressiyanın artmasının bir neçə əsas səbəbi var: İlk növbədə, ailə mühiti böyük rol oynayır. Uşaq zorakılıq, laqeydlik və ya davamlı konflikt olan bir mühitdə böyüyürsə, bu davranış modelini normallaşdırır. O, problemləri dialoqla deyil, güc və təzyiq vasitəsilə həll etməyə meyilli olur. Digər mühüm faktor sosial mediadır. Müasir dövrdə yeniyetmələr TikTok, Instagram kimi platformalarda şiddət, aqressiya və "güc nümayişi"ni təşviq edən məzmunlara tez-tez məruz qalırlar. Bu isə onların reallıq qavrayışını dəyişir və bəzi hallarda aqressiv davranışı "normal" kimi qəbul etmələrinə səbəb olur.

Həmçinin, məktəb mühitindəki psixoloji təzyiqlər: bullinq, rəqabət və.s kimi hallar da aqressiyanın artmasına gətirib çıxarır. Özünü ifadə edə bilməyən və ya qəbul olunmadığını hiss edən yeniyetmə daxili gərginliyi aqressiya ilə xaricə vurur. Yeniyetmələr çox zaman hisslərini düzgün tanıya və ifadə edə bilmirlər. Nəticədə qəzəb, qorxu və ya inciklik aqressiv davranışa çevrilir.

Sonda qeyd etmək istəyirəm ki, bu problemi yalnız cəza ilə həll etmək mümkün deyil. Burada əsas çıxış yolu maarifləndirmə, psixoloji dəstək və sağlam ünsiyyət mühitinin formalaşdırılmasıdır. Ailə, məktəb və cəmiyyət birlikdə hərəkət etmədikcə bu tendensiyanın qarşısını almaq çətin olacaq".

Telegramda izləyin