Uşaqlarda bu davranışların arxasındakı psixoloji səbəblər nədir? - AÇIQLAMA

"Dırnaq yemə və saç yolma kimi sadalanan, pozuntu kimi bilinən hallar əslində psixologiyada bəzən özünü sakitləşdirmə mexanizmləri kimi izah olunur. Ailədə gərginlik, məktəb problemi, yeni mühit, maddi çətinliklər və s. bu davranışların yaranmasına və ya artıq mövcuddursa artmasına səbəb ola bilər. Bəzən anksiyete pozuntusu da ola bilər. Diqqət və emosional ehtiyacdan dolayı, bəzən uşaq valideyn diqqətini çəkmək üçün bu davranışları şüuraltının təsiri ilə təkrarlayır".

Bu sözləri Sonxeber.az-a psioxoloq Samirə Bağırova danışıb.

O, açıqlamasında qeyd edib ki, saç yolma, qaş və ya kirpik yolma xüsusilə daha dərin psixoloji gərginliklə bağlı ola bilər və bəzi hallarda trikotillomaniya kimi tanınır:

"Uşaq daxili gərginliyi bu şəkildə boşaldır. Bəzi hallarda isə uşaq ətrafında yaxın kimisə bu davranışlardan hər hansı birini edərkən görürsə, onu təkrarlaya bilər.

Belə vəziyyətdə "etmə!", "ayıbdır!" kimi reaksiyalar uşağın stressini daha da artırır və davranışı gücləndirə bilər. Cəzalandırmaq və ya utandırmaq qətiyyən olmaz. Səbəbini anlamağa çalışmaq lazımdır. Nə qədər müddətdir bu davranışı edir, bunu edərkən nə hiss edir - kimi suallar verməklə uşağın emosiyasını ifadə etməsinə kömək etmək olar.

Uşağa əlləri ilə məşğul ola biləcəyi fəaliyyətlər tapmaq lazımdır: rəsm çəkmək, stress topu, plastilin və s. Hər gün uşaqla 20-25 dəqiqə göz-gözə söhbət etmək, birlikdə vaxt keçirmək vacibdir.

Əgər davranış kəskinləşibsə, artıq peşəkar psixoloqa və ya mütəxəssisə müraciət etmək vacibdir. Dırnaq yemə, dırnaq əti didmə, dodaq didmə, saç, qaş, kirpik yolma uşağın daxili narahatlığının ifadəsidir".

Vüsalə İbrahimli

Telegramda izləyin