"Maşını təmirə verdim, usta tərəfindən talan edilmiş halda tapdım" - ŞİKAYƏT

Bakıda Bəşir Bünyadovda ünvanında yerləşən maşın servislərindən birində fəaliyyət göstərən usta Şahnazarov Rövşən Allahverdi oğlu barədə saytımıza şikayət daxil olub.

Bu barədə Sonxeber.az -a zərərçəkmiş Tural Səmədov müraciət edib.

O bildirir ki, təmirə verdiyi maşınını usta tərəfindən talan edilmiş halda tapıb:

"01.04.2026-cı il tarixində avtomobilimi lyukunda yaranmış nasazlığın aradan qaldırılması üçün Şahnazarov Rövşən Allahverdi oğluna təhvil vermişdim. O, bəzi ehtiyat hissələrinin alınmalı olduğunu bildirərək məndən əlavə ödəniş tələb etmiş, mən də qeyd etdiyi məbləği göndərmişdim ki, problemi həll etsin.

Lakin 05.04.2026-cı il tarixində mənə zəng edərək bildirdi ki, guya sənədləri olmadığı üçün polis əməkdaşları avtomobili ondan alıblar və heç bir protokol tərtib edilməyib. Onun bu izahı məndə şübhə doğurdu və məsələni dəqiqləşdirmək üçün növbəti gün şəxsən aidiyyəti üzrə müraciət etdim.

Polis əməkdaşlarından aldığım məlumata əsasən, həmin şəxs şübhəli sürücülük davranışına görə saxlanılmış, yoxlama zamanı sərxoş vəziyyətdə olduğu müəyyən edilmiş və bu fakt onun öz izahatı ilə də təsdiqlənmişdir. Buna baxmayaraq, o, əvvəlcə məsuliyyətdən yayınmaq üçün yalan məlumat vermiş, daha sonra isə cəriməni ödəyəcəyinə söz versə də, ertəsi gündən etibarən yoxa çıxmışdır.

Avtomobilimin saxlanıldığı cərimə meydançasına baxış zamanı aşkar etdim ki, nəqliyyat vasitəsinin salonu dağıdılmış, bir sıra detallar sökülərək götürülmüşdür. Bu hal mənə külli miqdarda maddi ziyan vurulduğunu göstərir.

Qeyd etmək istəyirəm ki, Şahnazarov Rövşən Allahverdi oğlu mənim icazəm olmadan, sənədsiz və sərxoş vəziyyətdə avtomobilimi idarə etmiş, eyni zamanda onun texniki hissələrinə müdaxilə edərək zərər vurmuşdur. Onun məsuliyyətsiz və qanunsuz hərəkətləri daha ağır nəticələrə də səbəb ola bilərdi.

Bundan əlavə, həmin şəxslə əlaqə saxlamaq mümkün olmadığından başqa telefon nömrəsindən onunla əlaqə yaratdım. Zəngə cavab verdi. Ona avtomobilimin niyə sökülərək talan edildiyini soruşduqda, məsuliyyəti öz üzərindən ataraq bu hərəkətlərin guya polis əməkdaşları tərəfindən edildiyini bildirdi. Hətta qeyd etdi ki, buna etiraz etsə də, guya buna baxmayaraq həmin əməl həyata keçirilib. Onun bu izahları əsassız olmaqla yanaşı, dövlət orqanlarına qarşı açıq şəkildə böhtan xarakteri daşıyır.

Yuxarıda qeyd olunanları nəzərə alaraq, aidiyyəti qurumlardan xahiş edirəm ki, həmin şəxsin tapılaraq qanun qarşısında cavab verməsi təmin edilsin və mənə vurulmuş maddi ziyanın tam şəkildə ödənilməsi istiqamətində tədbirlər görülsün".

Zərəçəkmiş bildirir ki, məsələ ilə bağlı polisə dəfələrlə müraciət etsə də, onun şikayətinə baxılmayıb:

"Məsələ ilə bağlı 12 nömrəli Polis İdarəsində şikayət ərizəmi yazmışam, "102" -yə dəfələrcə zəng edib şikayətimə baxılmasını xahiş etmişəm, lakin heç bir polis əməkdaşı mənimlə əlaqə saxlamayıb"

Telegramda izləyin