"Evlilik bir dəfə qurulan deyil, hər gün yenidən "qurulan" bir münasibətdir" - AÇIQLAMA

Evlilik kənardan sadə görünən, amma daxilində çox incə psixoloji balanslar olan bir münasibət modelidir. İnsanlar çox vaxt "sevgi varsa hər şey düzələr" düşüncəsi ilə bu yola çıxır, amma real həyatda evliliyi uzun müddət ayaqda saxlayan təkcə hisslər deyil, davranışlar, qarşılıqlı münasibət və emosional yetkinlikdir. Bəs görəsən sağlam bir evliliyin təməlində nə dayanır?

Psixoloq Gülsər Qədirli bu barədə Sonxeber.az -a açıqlama verib:

"Sağlam bir evliliyin təməlində bir neçə əsas dayaq dayanır. İlk növbədə etibar gəlir. Etibar yalnız xəyanət etməmək deyil, eyni zamanda sözünün üstündə durmaq, qarşı tərəfə güvən hissi vermək və şəffaf davranmaq deməkdir. Etibar zədələnəndə münasibət tədricən emosional uzaqlaşmaya çevrilir.

Digər vacib amil ünsiyyətdir. Bir çox evlilikdə problem sevginin olmaması yox, düzgün danışa bilməməkdir. Hissləri gizlətmək, susmaq və ya aqressiv şəkildə ifadə etmək zamanla yığılan gərginlik yaradır. Sağlam evlilikdə tərəflər həm problem danışa bilir, həm də bir-birini dinləməyi bacarır.

Üçüncü əsas sütun hörmət hissidir. Hörmət olmayan yerdə sevgi də uzunömürlü olmur. Tərəflərin bir-birinin şəxsi sərhədlərinə, düşüncələrinə və fərqliliklərinə sayğı göstərməsi münasibətin psixoloji təhlükəsizliyini təmin edir.

Evliliyin davamlılığı üçün fərdi məsuliyyət və yetkinlik də əsas rol oynayır. Tərəflərin hər biri "mən nə edə bilərəm ki, münasibət daha sağlam olsun?" sualını verməyi bacarmalıdır. Günah axtarmaq yox, həll axtarmaq evliliyi ayaqda saxlayan ən real yanaşmadır. Çünki, evlilik bir dəfə qurulan deyil, hər gün yenidən "qurulan" bir münasibətdir"

Telegramda izləyin