Dırnaq qaynağının hansı zərərləri var? - AÇIQLAMA

Son illərdə estetik baxımdan baxımlı görünmək istəyən qadınlar arasında dırnaq qaynağı və gel dırnaqlar xüsusilə geniş yayılıb. Uzun, formalı və rəngarəng dırnaqlar artıq bir çox xanım üçün gündəlik gözəllik rutininin ayrılmaz hissəsinə çevrilib.

Lakin bu prosedur nə qədər estetik görünüş qazandırsa da, düzgün aparılmadıqda və gigiyenik qaydalara əməl olunmadıqda sağlamlıq üçün müəyyən risklər yarada bilər.

Bəs görəsən bu risklər nələrdir?

Mövzu ilə bağlı Sonxeber.az-a açıqlama verən dermatoloq Dr. Vaqif Abdullayev bildirib ki, dırnaq qaynağı zamanı istifadə olunan materialların keyfiyyəti və prosedurun aparıldığı salonun gigiyenik vəziyyəti çox önəmlidir. Onun sözlərinə görə, əks halda həm dəridə, həm də ümumi orqanizmdə müxtəlif fəsadlar ortaya çıxa bilər.

Həkim qeyd edir ki, ən çox rast gəlinən problemlərdən biri keyfiyyətsiz gel və boyaların istifadəsi nəticəsində yaranan allergik reaksiyalar və dırnaq yatağının zədələnməsidir. Bir çox hallarda salonlarda müştərinin allergiya riski əvvəlcədən yoxlanılmır, alətlər isə lazımi səviyyədə sterilizə edilmir. Bu da infeksiya riskini artıran əsas amillərdən biridir.

Dermatoloqun sözlərinə görə, istifadə olunan kimyəvi maddələr dəri ilə uzun müddət təmasda olduqda müəyyən hissəsi orqanizmə sorula bilər və bu da ümumi sağlamlığa mənfi təsir göstərə bilər.

Digər mühüm məqam isə prosedur zamanı istifadə edilən ultrabənövşəyi (UV) lampalardır. Bu lampalar gelin bərkiməsi üçün vacib olsa da, uzunmüddətli və tez-tez istifadədə dəridə erkən qocalma, incə qırışların yaranması və hətta gələcəkdə dəri xərçəngi riskinin artması ilə əlaqələndirilir.

Mütəxəssis tövsiyə edir ki, qadınlar belə prosedurlardan istifadə edərkən dərilərini qorumaq üçün SPF tərkibli qoruyucu kremlərdən istifadə etməli, həmçinin yalnız etibarlı və gigiyenik standartlara uyğun salonlara müraciət etməlidirlər.

Telegramda izləyin