Dünya çempionu Tunar Axundzadəyə iki nüfuzlu hakim adı verildi

Kyokushinkai Karate üzrə dünya çempionu Tunar Axundzadə növbəti uğura imza atıb. 2022 ci ildə dünya çempionatında 1-ci yerə layiq görülən idmançı bu dəfə hakimlik fəaliyyəti ilə diqqət mərkəzinə düşüb. Belə ki, o, beynəlxalq arenada göstərdiyi peşəkar hakimlik fəaliyyətinə görə "İlin hakimi" və "Perspektivli hakim" adlarına layiq görülüb. Bu adlar onun yalnız idmançı kimi deyil, eyni zamanda hakim kimi də yüksək səviyyədə olduğunu təsdiqləyir.

Məlumata görə, sözügedən hakimlik mükafatları Azərbaycan Kyokuşinkay Karate və Ciyutaido federasiyasının prezidenti, kanço Teyyub Əzizov tərəfindən təqdim olunub. Qeyd edək ki, Kyokushinkai Karate dünyada ən sərt və rəqabətli döyüş növlərindən biri hesab olunur. Bu sahədə həm idmançı, həm də hakim kimi fərqlənmək nadir hallarda rast gəlinən uğurlardandır.
BiG.AZ-a açıqlamasında Tunar bəy bildirdi ki, 12 yaşından bu idman növü ilə məşğul olur: "5 il ərzində bir çox nailiyyətlərim olub. İlk nailiyyətim Bakı çempionatında 2-ci yerə layiq görülməyim idi. Sonra ard- arda Bakı çempionatında 2 dəfə qızıl medal, Respublika çempionatında bürünc medala layiq görülmüşəm. 2022-ci ildə Türkiyənin İstanbul şəhərində keçirilən Dünya Çempioanatında 2 rəqibimi üstələyərək 1-ci yerin sahibi olmuşam.

Həmin ilin dekabr ayında "İlin idmançısı" adına layiq görülmüşəm. 2023- cü ildən etibarən təhsilimlə əlaqədar məşqlərimə aktiv şəkildə davam edə bilməsəm də, son 3 ildə bir çox yarışlarda hakim kimi fəaliyyət göstərmişəm. Bu fəaliyyətimin nəticəsi olaraq 2024-cü ilin sonunda "İlin hakimi" və 2025-ci ilin dekabrında "Perspektivli hakim" adları ilə təltif edilmişəm" deyə Axundzadə qeyd edib.

Tunar Axundzadənin əldə etdiyi bu nəticə Azərbaycan idmanının beynəlxalq nüfuzunun artmasına mühüm töhfə kimi dəyərləndirilir.
Müəllif: İlkin Məmmədkərimov

Telegramda izləyin