"İtaliya Azərbaycanın ərazi bütövlüyünə hörmət göstərən, regionda sabitliyi dəstəkləyən ölkələr sırasında yer alır" - Bəhruz Quliyev

"Azərbaycan - İtaliya münasibətləri artıq diplomatik əlaqələr çərçivəsindən çıxaraq strateji tərəfdaşlıq səviyyəsinə yüksəlib. Azərbaycan ilə İtaliya arasında formalaşan qarşılıqlı etimad həm siyasi, həm iqtisadi, həm də enerji təhlükəsizliyi baxımından Avropa məkanında mühüm əhəmiyyət daşıyır."

Bu fikirləri Sonxeber.az#a Səs qəzetinin baş redaktoru, siyasi ekspert Bəhruz Quliyev deyib.

Ekspert qeyd edib ki, bu gün İtaliya Azərbaycanın Avropadakı ən etibarlı tərəfdaşlarından biri, Azərbaycan isə İtaliyanın enerji təhlükəsizliyində mühüm rol oynayan ölkələrdən biridir:

"Xüsusilə, neft, qaz təchizatı, nəqliyyat-logistika marşrutları, investisiya layihələri və sənaye əməkdaşlığı iki ölkə arasındakı əlaqələri daha da gücləndirir. Təsadüfi deyil ki, Prezident İlham Əliyev də İtaliyanın baş nazirinin Azərbaycana səfəri çərçivəsində İtaliyanın ölkəmizin əsas ticarət tərəfdaşlarından biri olduğunu vurğuladı.
"Düşünürəm ki, Azərbaycan-İtalya əməkdaşlığı emosiyalara deyil, real maraqlara, qarşılıqlı hörmətə və uzunmüddətli strateji baxışa söykənir. Bu isə müasir beynəlxalq münasibətlər sistemində ən yaxşı nümunələrdən biridir.

İtaliya Azərbaycanın ərazi bütövlüyünə hörmət göstərən, regionda sabitliyi dəstəkləyən ölkələr sırasında yer alır.
Hesab edirəm ki, Giorgia Meloninin Bakıya səfəri çərçivəsində hər iki tərəfdən verilən mesajlar qarşıdakı dövrdə yeni investisiyalar, sənaye əməkdaşlığı, Qarabağda bərpa layihələri və humanitar sahələrdə də münasibətlərin daha sürətli inkişafından xəbər verir. Nəzərə alsaq ki, İtaliya Avropanın mühüm ölkəsidir, bu qənaətə gəlmək olar ki, bundan sonra Avropa ilə Cənubi Qafqaz arasında etibarlı körpü rolunu oynayacaq,"-deyə, B.Quliyev əlavə edib.

Telegramda izləyin