Qlobal aviasiyada böhran dərinləşir: uçuşlar azalır, biletlər bahalaşır

"Financial Times" yazır ki, İranda baş verən münaqişə fonunda artan yanacaq qiymətləri qlobal aviasiya sektoruna ciddi təsir göstərib.

Məlumata görə, təyyarə yanacağının qiymətində ikiqat artım qeydə alınıb ki, bu da birbaşa olaraq aviabiletlərin bahalaşmasına səbəb olub. Nəticədə həm sərnişin daşımalarında, həm də uçuş planlamasında ciddi dəyişikliklər baş verib.

BİG.AZ xəbər verir ki, xüsusilə Avropa və Asiya arasında uçuşların böyük hissəsini təmin edən Körfəz ölkələrində bəzi hava limanlarının fəaliyyətinin məhdudlaşması hava nəqliyyatında əlavə çətinliklər yaradıb. Bu vəziyyət uçuşların idarə olunmasını daha da mürəkkəbləşdirib.

Statistik göstəricilərə əsasən, dünya üzrə aviaşirkətlər may ayı uçuş cədvəllərindən ümumilikdə 2 milyon oturacaq yerini çıxarıb, eyni dövrdə isə təxminən 12 min reys ləğv edilib. Bu göstəricilər qlobal aviasiya bazarında ciddi daralma olduğunu ortaya qoyur.

Məlumata görə, uçuşları və oturacaq yerlərini azaldan şirkətlər arasında ilk sıralarda Türk Hava Yolları, China Airlines və Lufthansa yer alıb. Siyahıda həmçinin United Airlines, British Airways, American Airlines və All Nippon Airways kimi iri aviaşirkətlər də var.

Qeyd edək ki, bütün statistik göstəricilər "Cirium" analitik şirkətinin məlumatlarına əsaslanır.
Müəllif: İlkin Məmmədkərimov

Telegramda izləyin