Onlayn satış platformaları fiziki mağazaları üstələyir? - AÇIQLAMA

Son illərdə geyim pərakəndə satış sektorunda ciddi dəyişikliklər müşahidə olunur. Bir çox fiziki geyim mağazası fəaliyyətini dayandırır, eyni zamanda onlayn satış platformalarının sürətlə böyüməsi bu sahədə rəqabəti daha da kəskinləşdirir.

Bu proses həm istehlakçı davranışlarının dəyişməsi, həm də biznes modellərinin yenilənməsi ilə əlaqələndirilir.

Bəs görəsən geyim mağazalarının bağlanmasının əsas səbəbləri nədir və onlayn satış platformaları bu sahədə həqiqətən fiziki mağazaları üstələyir, yoxsa bu dəyişimin arxasında daha geniş iqtisadi və davranış faktorları dayanır?

Mövzu ilə bağlı Strateji Kommunikasiya üzrə ekspert Səfər Aslanov Sonxeber.az -a açıqlama verib:

"Geyim pərakəndə satış sektorunda fiziki mağazaların tənəzzülü yalnız onlayn rəqabətin deyil, bir-birini gücləndirən struktur amillərin nəticəsidir. McKinsey və Business of Fashion-ın "State of Fashion 2024" hesabatına görə, qlobal geyim sənayesi 2024-cü ildə cəmi 2-4% artım nümayiş etdirəcək. Bu sektorun zəif vəziyyətini açıq şəkildə əks etdirir. Geyimə oul xərcləmə niyyəti Avropada 39%, ABŞ-da isə 25% azalıb. Yüksək icarə xərcləri, "showrooming" davranışı yəni müştərilərin mağazada sınadıqdan sonra onlayn alması və COVID-19-un sürətləndirdiyi rəqəmsal keçid bu prosesi katalitik şəkildə dərinləşdirdi.

Lakin məsələni sadəcə "onlayn vs fiziki" müstəvisində dəyərləndirmək yanıldıcı olardı. ABŞ-da 2024-cü ildə ümumi pərakəndə satışların 16.9%-i geri qaytarılmış, onlayn satışlarda isə bu nisbət 20%-ə yaxınlaşmışdır. Geyim kateqoriyasında isə geri qaytarma nisbəti 30-40%-ə çatır ki, əsas səbəb kimi ölçü uyğunsuzluqları və fitə dair subyektiv gözləntilər göstərilir.
Bu yük platformaların mənfəat marjasını ciddi şəkildə aşındırır və məhz buna görə Warby Parker, Allbirds və Amazon kimi əvvəlcə tamamilə onlayn fəaliyyət göstərən brendlər fiziki mağaza açmağa başladı. Beləliklə, qalib tərəf nə yalnız onlayn, nə də yalnız fiziki kanal əksinə, istehlakçı təcrübəsini bütövləşdirə bilən inteqrasiya modelidir".

Telegramda izləyin