"Ağıl və ürək dilemması daxili qarışıqlığın əlamətidir" - PSİXOLOQ

Ətrafımızsan, sosial şəbəklərdən izlədiyimiz və gördüyümüz qədəri ilə bir çox münasibətlərdə ciddi bir problem yaşandıqdan sonra tərəflər münasibəti sorğulamağa başlayır və ağıl ilə ürək arasında qalaraq qərar verməkdə çətinlik çəkirlər. Bəs, belə hallarda daha sağlam və düzgün qərar vermək üçün psixoloji baxımdan hansı yanaşmalar və addımlar tövsiyə olunur?

Mövzu ilə bağlı Sonxeber.az-a psixoloq Samirə Bağırova danışıb.

O, açıqlamasında qeyd edib ki, ağıl və ürək dilemması adətən problemin özü deyil, daha çox insanın daxilindəki qarışıqlığın əlamətidir:

"İnsan daxilən həmişə doğru cavabı bilir. Sadəcə həqiqət çox zaman acı və iztirablı olduğu üçün, insan illuziyanı seçir. Özü- özünü aldatmağı. Emosiyalara qapılır və özünə seçim yaradır. Halbuki, mövzu münasibətdirsə ya ayrılmaq, yaxud insan öz sevgisinə rəğmən davam qərarını vermək elə də çətin bir məsələ deyil. Məsələni çətinləşdirən insanın özünə və öz hisslərinə əmin olmamasıdır. Yaxud qarşı tərəfin güvəndə yaratdığı çatlardır. Problem baş verən anda verilən qərarlar çox vaxt impulsiv olur. Bir az ara vermək vacibdir. Bu qaçmaq deyil, emosiyaların sakitləşməsi və məntiqlə qərar verməsinə şərait yaratmaqdır. Çünki güclü emosiyalar altında beyin təhlükə rejimində işləyir, obyektiv düşünmək çətinləşir. Çox insan çox vaxt "münasibət pisdir" deyir, amma konkret səbəbi ifadə edə bilmir. Problemin adı aydın olmayanda, həlli də mümkün olmur. Bəzən isə sadalananlardan məlum olur ki, problem danışanın özündədir. Mükəmməllik axtarışındadır. Dəyərləri yoxlamaq üçün insanın özünə verə biləcəyi kritik sual budur; "Bu münasibət mənim əsas dəyərlərimlə uyğun gəlirmi?". Biri üçün sadiqlik, digəri üçün azadlıq ön plandadırsa bu münasibətdə tez- tez konfliktlərin yaranması və ayrılıq qaçınmazdır. Nəticə sadəcə bir az uzana bilir".

Vüsalə İbrahimli

Telegramda izləyin