"Ermənistanda hakimiyyətə gələcək qüvvələr düşünməlidir ki, hər şey 7 iyun tarixi ilə məhdudlaşmır, ondan sonrası da var" - DEPUTAT

Xəbər verdiyimiz kimi İyunun 7-də Ermənistanda parlament seçkiləri keçiriləcək. Ermənistanda keçiriləcək parlament seçkiləri ərəfəsində Qafqazda sabitliyi pozmağa çalışan və Azərbaycan-Ermənistan arasında davam eden sülh prosesinə maneə törədən qüvvələr yenidən aktivləşəcək. Bu prosesdə Ermənistan hansı addımları ata bilər?

Bununla bağlı Sonxeber.az-a danışan deputat Azər Badamov bildirib ki, söhbət yalnızca Ermənistandan və orada keçiriləcək seçkilərdən getmir:

"Bütövlükdə beynəlxalq münasibətlər tarixinə, dünyada gedən proseslərə nəzər yetirdiyimiz zaman tarix bizə onu göstərir ki, hansısa bir regionda, hansısa bir ölkənin daxilində taleyüklü qərarlar alındığı zaman Qərb və Rusiya, eləcə də digər dövlətlər buraya maraq göstərirlər ki, həmin o məqamdan istifadə edərək öz maraqlarını təmin etməyə çalışsınlar və yaxud da öz maraqlarını təmin etmək üçün yaxın olduqları qüvvələrə dəstək versinlər. Təbii ki, Ermənistanda keçiriləcək seçki bu baxımdan münbit zəmin yaradıb ki, tərəflər öz maraqlarını təmin etsinlər. Azərbaycanın yanaşması olduqca aydındır. Biz əməkdaşlığı təşviq edirik, sülh quruculuğunda qətiyyətliyik, məsələlərə keçmiş üzərindən deyil, indiki məqamdan yanaşırıq. Çünki biz keçmişə dönüb baxsaq, o zaman düşünürəm ki, sülh istiqamətində irəliləmək mümkün olmayacaq".

Deputat vurğulayıb ki, cənab Prezident İlham Əliyev bu dəfə də Zəngilandan və Cəbrayıldan o mesajları verdi ki, biz əgər lazımi nöqtədə və məqamda dayanmasaydıq, hadisələrin nəticəsi Ermənistan üçün daha acınacaqlı olardı:

"Eləcə də indiki məqamda sərhədə gəlib yerləşən tərəflər, kəslər fon yaratmaq üçün əgər hər hansı ritorika formalaşdırır, əgər mümkün olmayam ssenarilər cızırlarsa ki, guya Ermənistanı Azərbaycandan qorusunlar və yaxud da qoruyacaqlar, buna əsas yoxdur. Çünki Azərbaycan elə addımlar atmır ki, Ermənistanı kiminsə qormağına ehtiyac yaransın.Ermənistan artıq öz müqəddəratını təyin etmək istiqamətində kamillik nümayiş etdirməlidir. Ermənistan o qədər yarımçıq, müstəqil olmayan siyasət yürüdüb ki, bu gün Ermənistanla ultimatum dilində danışılır, Ermənistana barmaq silkələnir. Təbii ki, Ermənistanda keçiriləcək parlament seçkiləri ərəfəsində də sülh prosesinə maneə törətməyə çalışan qüvvələrin aktivliyini görəcəyik. Artıq bu prosesə indidən başlayıblar.

Ermənistanın atmalı olduğu addımlar sadədir. Daxili birliyini qoruyub saxlamaq, təmkin nümayiş etdirmək, impulsiv qərarlar almamaq, tərəflərlə açıq konfrantasiyaya getməmək.Regionu, coğrafiyanı nəzər alaraq qonşu dövlətlərə qarşı ərazi iddiasından əl çəkmək lazımdır, bunu rəsmiləşdirməyi tezləşdirmək zəruridir. Ziddiyyətli məqamları daha da qabartmamaq lazımdır. Bu istiqamətdə Ermənistanda hakimiyyətə gələcək qüvvələr düşünməlidir ki, hər şey 7 iyun tarixi ilə məhdudlaşmır və orada bitmir, ondan sonrası da var. Yəni, əgər belə bir ssenarilər cızılırsa ki, revanşizmə dəstək versinlər, revanşist qüvvələri yenidən hakimiyyətə gətirsinlər və müharibə ritorikasını alovlandırsınlar və bu istiqamətdə addımlar atsınlar, burada uduzan birinci tərəf məhz Ermənistan olacaq. Odur ki, dönüş nöqtəsini demək olar ki, əhəmiyyətli dərəcədə geridə qoymuşuq, müsbət irəliləyişlər əldə etmişik. Bu müsbət irəliləyişlərin inkişaf etməsi trayektoriyası üzrə hərəkət edilməlidir".

Telegramda izləyin