Hər kəs psixoloq ola bilərmi? - AÇIQLAMA

Son illərdə psixologiyaya marağın artması ilə birlikdə "Hər kəs psixoloq ola bilərmi?" sualı da tez-tez müzakirə olunur.

Xüsusilə sosial şəbəkələrdə insanların özlərini "psixoloq" kimi təqdim etməsi bu peşənin əsl mahiyyəti ilə bağlı suallar yaradır.

Bəs görəsən həqiqət nəyi əks etdirir?

Psixoloq Güsər Qədirli bu barədə Sonxeber.az -a açıqlama verib:

"Şəxsən psixoloq olaraq deyirəm ki, hər insan psixoloq ola bilməz. Bu peşə yalnız maraq və ya ünsiyyət bacarığı ilə məhdudlaşmır. Psixoloq olmaq üçün ilk növbədə psixologiya sahəsində akademik təhsil almaq, insan davranışlarını elmi əsaslarla öyrənmək və peşəkar etik qaydalara yiyələnmək lazımdır. Çünki psixoloq insanların emosional vəziyyəti, travmaları və psixi sağlamlığı ilə işləyir.

Eyni zamanda bu sahədə empatiya, səbir, dinləmə bacarığı və emosional balans da çox vacibdir. Bəzi insanlar yaxşı dinləyici və anlayışlı ola bilər, lakin bu, onları avtomatik olaraq psixoloq etmir. Peşəkar psixoloq düzgün analiz aparmalı, insanın vəziyyətini doğru qiymətləndirməli və lazım gəldikdə uyğun mütəxəssisə yönləndirməlidir.

Digər tərəfdən, psixoloq daim öz üzərində işləməlidir. Bu sahədə təhsil aldıqdan sonra da müxtəlif təlimlər, praktikalar və superviziya prosesləri davam edir. Çünki insan psixologiyası mürəkkəb və daim dəyişən bir sahədir.

Bu səbəbdən psixoloqluq həm bilik, həm məsuliyyət, həm də peşəkar hazırlıq tələb edən ciddi bir ixtisasdır. Sadəcə insanlara məsləhət vermək və ya motivasiyaedici fikirlər paylaşmaq psixoloq olmaq anlamına gəlmir".

Telegramda izləyin