Antonio Campaqnoli: "2030-cu ilə qədər 3 milyard insanın mənzilə çıxışa ehtiyacı olacaq"

2030-cu ilə qədər təxminən 3 milyard insanın adekvat mənzilə çıxışa ehtiyacı olacaq.

"Report" xəbər verir ki, bunu İtaliya Beynəlxalq Daşınmaz Əmlak Federasiyasının Prezidenti Antonio Campaqnoli Bakıda Ümumdünya Şəhərsalma Forumunun 13-cü sessiyası (WUF13) çərçivəsində keçirilən Biznes Assambleyasında bildirib.

Onun sözlərinə görə, ölkələr qarşısındakı məsuliyyət yalnız daha çox mənzil tikməkdən ibarət deyil: "Söhbət adekvat, əlçatan, iqlim dəyişikliyinə davamlı, yaxşı yerləşdirilmiş, xidmətlərə qoşulmuş və real icmaları dəstəkləməyə qadir olan mənzillər tikməkdən gedir. Bunu dünyanın heç vaxt görmədiyi miqyasda etməliyik. 2030-cu ilə qədər təxminən 3 milyard insanın adekvat mənzilə çıxışa ehtiyacı olacaq ki, bu da hamımızı - hökumətləri, qurumları, icmaları və əlbəttə ki, özəl sektoru narahat etməlidir".

O qeyd edib ki, mənzil təminatı ilə bağlı problem tək bir böhran deyil: "Bu, müxtəlif yerlərdə fərqli formalar alır, lakin onun kökləri çox vaxt oxşardır. Parçalanmış planlaşdırma, torpaq məhdudiyyətləri, tənzimləyici gecikmələr, kifayət qədər olmayan infrastruktur, maliyyəyə qeyri-bərabər çıxış və dəyər zənciri boyunca zəif koordinasiya. Odur ki, mənzil təminatı bir sistem kimi başa düşülməlidir: tək bir tikinti məsələsi kimi deyil, sadə bir təklif və tələb məsələsi kimi deyil, bir-birinə bağlı şərtlər zənciri kimi. Əgər bu zəncirdəki bir halqa zəifdirsə, bütün sistem aşağı nəticə göstərir".

A.Campaqnoli vurğulayıb ki, mənzil təminatını ikinci dərəcəli bazar məsələsi kimi qəbul etməyi dayandırmaq və onu əsas sosial və iqtisadi infrastruktur kimi qəbul etmək lazımdır.

Telegramda izləyin