"Qeybət insan həyatında sosial dinamikanın bir hissəsidir" - Samirə Bağırova

Gündəlik həyatın bir hissəsinə çevrilmiş qeybət, bəzən sadəcə söhbət kimi görünür, amma əslində insanların bir-birilə münasibətlərində, sosial iyerarxiyada və ictimai dəyərlərin formalaşmasında mühüm rol oynayır. Sosial mediada, iş mühitində və ailə daxilində belə, qeybətin müxtəlif formalarına rast gəlmək mümkündür. Bütün bunlar belə bir sualı gündəmə gətirir ki, insanlar niyə qeybət edir və bu davranışın arxasında hansı psixoloji motivlər dayanır?

Mövzu ilə bağlı Sonxeber.az-a psixoloq Samirə Bağırova danışıb.

O, açıqlamasında qeyd edib ki, əslində qeybət həmişə pis niyyətlə edilmir:

"Qeybət bir növ insan həyatında sosial dinamikanın bir hissəsidir. Emosional yüngülləşmə, insanın özünü hər hansısa qrupa aid etmək istəyi, qeybət etməklə diqqətləri üzərinə çəkməkdir. İnsan bəzən başqalarının həyatını müzakirə etməklə özünü daha uğurlu,daha düzgün və ya daha təhlükəsiz hiss etməyə çalışır. Bu xüsusilə özgüvən problemi,daxili narazılıq və ya qəbul olunmaq ehtiyacı yaşayan insanlarda daha çox görünür. Emosional tərəfi isə odur ki,gündəlik stres, qəzəb və ya məyusluq hisslərini birbaşa ifadə edə bilməyəndə,bunu qeybət yolu ilə çıxarmağa çalışırlar. Əvvəlki illərlə müqayisədə indi qeybət daha çoxdur. Buna səbəb sosial mediadır. Təbii ki, dağıdıcı qeybətlər də var ki,nəzarətsiz hala gəldikdə münasibətlərə, etimada və cəmiyyət daxilindəki sağlam ünsiyyətə ciddi təsir göstərə bilir. Bu cür qeybətlər insanı alçaltmaq,nüfuzdan salmaq və ya emosional zərər vermək məqsədi daşıdığı hallarda yaranır".

Vüsalə İbrahimli

Telegramda izləyin