Kayahanın qızından qalmaqallı Nilufer açıqlaması: "Münasibətinizi öyrənəndə 8 yaşım var idi"

Türk musiqisinin unudulmaz simalarından olan mərhum sənətçi Kayahanın illər əvvəl yazdığı, lakin indiyədək yayımlanmayan "Sabaha Kadar" adlı mahnısının Nilüfer tərəfindən səsləndiriləcəyinin açıqlanması qalmaqala səbəb olub.

Sonxeber.az xarici mediaya istinadla xəbər verir ki, layihənin elanından sonra Kayahanın qızı Beste Açar sosial media hesabında sərt açıqlamalar verərək həm Nilüferi, həm də atasının keçmiş həyat yoldaşı İpek Açarı hədəfə alıb.

Beste Açar paylaşımında uzun illər susduğunu bildirərək, Nilüferlə bağlı diqqətçəkən iddialar səsləndirib. O, uşaqlıq illərinə istinad edərək, atası ilə Nilüfer arasında münasibət olduğunu öyrəndiyi vaxt yaşadığı sarsıntını xatırladıb.

"Bunu öyrənəndə cəmi 8 yaşım var idi. Həmin hadisəni nə mən, nə də anam heç vaxt unutmadıq", - deyə Açar qeyd edib.

Kayahanın indiyədək yayımlanmamış əsərlərinin qorunması və gələcəkdə səsləndirilməsi üçün illərdir mübarizə apardığını bildirən Beste Açar, "Sabaha Kadar" mahnısının hazırlanması prosesində özündən xəbərsiz addımlar atıldığını iddia edib.

Açar, Nilüfer və İpek Açarın birlikdə hərəkət etdiyini irəli sürərək, atasının musiqi irsi ilə bağlı qərarların onun razılığı olmadan verildiyini bildirib. O, paylaşımında İpek Açarı sərt ifadələrlə tənqid edib və baş verənlərlə bağlı hüquqi prosedurlara başlayacağını açıqlayıb.

Məsələ ilə bağlı Nilüfer və İpek Açar tərəfindən hələlik hər hansı rəsmi açıqlama verilməyib.

Telegramda izləyin