Türkiyəli aktyorun açıqlaması mübahisə doğurdu

Türkiyəli aktyor Halil Ergün qatıldığı YouTube proqramında səsləndirdiyi fikirlərlə ictimai müzakirələrə səbəb olub.

Sonxeber.az türk mediasına istinadən xəbər verir ki, özünü "Cümhuriyyətçi" kimi təqdim edən Ergün, Atatürkçülük anlayışına münasibətini açıqlayarkən diqqətçəkən ifadələr işlədib. Aktyor bildirib ki, Türkiyədə müxtəlif problemlərin və yanlışlıqların arxasında bəzən özünü Atatürkçü kimi təqdim edən şəxslər dayanır.

Müsahibə zamanı Mustafa Kamal Atatürk, Cümhuriyyətin qurulması prosesi və Atatürkçülük ideologiyası ilə bağlı fikirlərini bölüşən Ergün, özünü Atatürkçüdən daha çox Cümhuriyyətçi hesab etdiyini vurğulayıb.

Aktyorun "Türkiyədə hər cür işi Atatürkçüyəm deyənlər görür" məzmunlu sözləri sosial şəbəkələrdə geniş rezonans doğurub. Onun açıqlamaları istifadəçilər arasında fikir ayrılığı yaradıb. Bir qrup sosial media istifadəçisi Ergünün fikirlərini dəstəkləsə də, digərləri bu çıxışı tənqid edib.

Qeyd edək ki, Halil Ergün daha əvvəl də ictimai-siyasi mövzularla bağlı açıqlamaları ilə gündəmə gəlib.

Telegramda izləyin