Yarımçıq qalan böyük sevgi: Türkan Şorayla Kadir İnanır niyə evlənmədi?

Türk kinosunun unudulmaz simaları Türkan Şoray və Kadir İnanır haqqında illər əvvəl ortaya atılan iddialar yenidən gündəmə gəlib.

Demokrat.az xəbər verir ki, uzun illər Yeşilçamın ən çox yaraşdırılan cütlüklərindən biri hesab edilən ikilinin evlilik məsələsində fikir ayrılığı yaşadığı və bu səbəbdən yollarını ayırdığı iddia olunurdu. Kadir İnanırın vəfatından sonra onların münasibəti yenidən maraq doğurub.

Kadir İnanır Türkan Şorayla niyə evlənmədi?

Türk kinosunun əfsanəvi cütlüyü Türkan Şoray və Kadir İnanır həm ekran uyğunluğu, həm də şəxsi həyatları ilə illər boyu gündəmdə olublar. Onların niyə ailə qurmadığı isə uzun illərdir maraq doğuran mövzulardan biridir.

İddialara görə, münasibətlərdə soyuqluğun başlanğıcı Kadir İnanırın illər əvvəl verdiyi müsahibədə söylədiyi "İstəsəydik, Türkan Şorayla evlənərdik" sözləri olub. Daha sonra eyni sual Türkan Şoraya ünvanlanıb və o da "Bəli, istəsəydik evlənərdik" cavabını verib.

Lakin sonradan Kadir İnanırın başqa bir müsahibəsində dediyi iddia olunan "Türkan Şorayla əsla evlənməzdim" ifadəsi Şorayın inciməsinə səbəb olduğu barədə xəbərlər yayılıb.

İddialara əsasən, bundan sonra iki sənətçi arasında münasibətlər gərginləşib və müxtəlif tədbirlərdə bir-birlərinə qarşı məsafəli davranıblar. Bununla belə, tərəflər bu mövzu ilə bağlı ictimaiyyətə ətraflı açıqlama verməyiblər və bu səbəbdən deyilənlər rəsmi təsdiqini tapmayıb.

Bir müddət Türkan Şorayın təqdim etdiyi televiziya proqramına Kadir İnanırın dəvət ediləcəyi də gündəmə gəlmişdi. İnanır isə ona rəsmi dəvət gəlmədiyini, gəlsə belə, uzun illərdir televiziya proqramlarına qatılmamaq prinsipini davam etdirdiyini bildirmişdi.

Kadir İnanır kimdir?

Kadir İnanır 15 aprel 1949-cu ildə Türkiyənin Ordu vilayətinin Fatsa rayonunda anadan olub. O, 1967-ci ildə keçirilən "Kino Artisti" müsabiqəsində finalçı olduqdan sonra kino karyerasına başlayıb.

İlk baş rolunu 1970-ci ildə çəkilən "Kara Gözlüm" filmində canlandırıb. Daha sonra Türkan Şorayla birlikdə çəkildiyi "Selvi Boylum Al Yazmalım", eləcə də "Bir Yudum Sevgi", "Tatar Ramazan", "Yılanların Öcü" kimi filmlərlə Türk kinosunun ən məşhur aktyorlarından birinə çevrilib.

Karyerası ərzində yüzlərlə film və televiziya layihəsində iştirak edən Kadir İnanır canlandırdığı prinsipial və güclü obrazlarla tamaşaçıların rəğbətini qazanıb.

2024-cü ildə səhhətində yaranan problemlərlə əlaqədar uzun müddət müalicə alan aktyor 26 iyun 2026-cı ildə vəfat edib.

Telegramda izləyin