Kadir İnanırın vəsiyyəti açıqlandı

77 yaşında orqan çatışmazlığı səbəbindən vəfat edən Kadir İnanırın illər əvvəl verdiyi mühüm qərar ictimaiyyətə açıqlanıb.

Milli.Az Türkiyə mətbuatına istinadən xəbər verir ki, mərhum sənətçinin anım mərasimində çıxış edən qardaşı oğlu Levent İnanır bildirib ki, aktyor sağlığında bütün orqanlarını bağışlamaq barədə vəsiyyət edib.

Onun sözlərinə görə, Kadir İnanır bu istəyini illər əvvəl verdiyi müsahibələrin birində də dilə gətirmişdi. Mərhum aktyor xüsusilə ürəyi və gözlərinin başqa insanlara həyat bəxş etməsi fikrinin onu xoşbəxt etdiyini söyləmişdi.

Levent İnanır qeyd edib ki, bu qərar sənətçinin insanlara yardım etməyə olan həssas münasibətini və humanist baxışlarını əks etdirir. O, ailə üzvlərinin də mərhumun vəsiyyətinə böyük hörmətlə yanaşdıqlarını vurğulayıb.

Qeyd edək ki, Kadir İnanır uzun illər Türk kinosunun ən tanınmış simalarından biri kimi fəaliyyət göstərib. "Yeşilçam" dövrünün əfsanəvi aktyoru canlandırdığı yaddaqalan obrazlarla milyonlarla tamaşaçının sevgisini qazanıb. Onun vəfat xəbəri Türkiyədə və türk dünyasında böyük kədər hissi ilə qarşılanmışdı.

Telegramda izləyin