Super Liqa klubu "Qarabağ"la transfer danışıqlarına başlayır

Türkiyənin Super Liqa təmsilçisi "Göztəpə" yeni mövsüm öncəsi transfer çalışmalarını davam etdirir.

Qaynarinfo Türkiyə mediasına istinadən xəbər verir ki, daha əvvəl İngiltərənin "Bristol Siti" klubundan Sinkler Armstronq və Braziliyanın "Qremio" komandasından Andre Enrikeni heyətinə qatan İzmir təmsilçisi bu dəfə sol cinah müdafiəçisi transferinə yönəlib.

Məlumata görə, "Göztəpə" "Qarabağ"ın 25 yaşlı sol cinah müdafiəçisi Elvin Cəfərquliyevlə maraqlanır. Bildirilir ki, İzmir klubu yaxın vaxtlarda rəsmi danışıqlara başlayacaq və futbolçu üçün təklif təqdim edəcək.

2027-ci ilin iyun ayınadək "Qarabağ"la müqaviləsi olan Elvin Cəfərquliyevin komandadan ayrılmağa müsbət yanaşdığı, lakin Ağdam təmsilçisinin transferdən gəlir əldə etmək istədiyi qeyd olunur. Tərəflərin yaxın günlərdə danışıqlara başlaması və müzakirələrin uğurla yekunlaşacağı təqdirdə transferlə bağlı rəsmi addımların atılacağı gözlənilir.

Elvin Cəfərquliyev ötən mövsüm "Qarabağ"ın heyətində bütün turnirlərdə 42 oyuna çıxıb, 2 qol vurub və 1 məhsuldar ötürmə ilə yadda qalıb.

Telegramda izləyin