Qurban Qurbanov: "Bir neçə gün vaxtımız olsaydı..."

"Qarabağ"ın Avstriyadakı təlim-məşq toplanışı pis keçməyib.

Qaynarinfo xəbər verir ki, bunu Ağdam təmsilçisinin baş məşqçisi Qurban Qurbanov klubun mətbuat xidmətinə açıqlamasında deyib.

Mütəxəssis keçirdikləri iki yoxlama oyunu barəsində danışıb:

"Bu gün iki oyun keçirdik. "Xarkov"la birinci matçda daha çox gənc futbolçular çıxış etdilər. Maraqlı, dinamik mübarizə oldu. Xeyli sayda qol epizodları yaratdıq. Günün ikinci matçındakı rəqibimiz "Ferentsvaroş" da çox yaxşı kollektiv idi. Ümumilikdə öz planımız üzrə hazırlaşdıq. Pis alındığını deyə bilmərəm".

O, hazırlıq prosesindən razı qaldığını bildirərək, komandanın qarşıdakı vacib görüşlərə daha yaxşı vəziyyətdə çıxması üçün işlərin davam etdiriləcəyini vurğulayıb:

"Təbii ki, bir neçə gün vaxtımız olsaydı, daha yaxşı hazırlaşa bilərdik. Komandamızda kifayət qədər dəyişikliklər edilib. Futbolçuların bir yerdə olmalarına ehtiyac var idi. Futbolçular istəkli çalışdılar, hazırlıqları pis keçmədi. Oyun planı üzərində çalışmağa davam edəcəyik. Ümumilikdə yaxşı hazırlıq alındı. Futbolçuların bir neçə günlük istirahətə ehtiyacları var. Qarşıda çox vacib matçlar olacaq. Oyunçuları bu müddətdə yaxşı idman formasına salmağa çalışacağıq".

Qeyd edək ki, "Qarabağ" Avstriya toplanışında ötən gün iki yoxlama oyunu keçirib. Komanda günün ilk yarısında Ukraynanın "Xarkov" (2:6), ikinci yarısında isə Macarıstanın "Ferentsvaroş" (0:1) kollektivinə uduzub.

Telegramda izləyin