Demet Akalın yeni iş təkliflərini dayandırdı: "Həqiqətən çox yorulmuşam"

Türkiyəli müğənni Demet Akalın səhhətini nəzərə alaraq karyerasında müvəqqəti fasilə vermək qərarına gəlib.

Sonxeber.az xarici mediaya istinadla xəbər verir ki, sənətçi mövcud müqavilələrdən kənar yeni konsert və iş təkliflərini qəbul etməyəcəyini açıqlayıb.

Yay mövsümü üçün nəzərdə tutulan sıx konsert qrafikinin onu həm fiziki, həm də psixoloji baxımdan həddindən artıq yorduğunu bildirən Akalın yaşadığı vəziyyəti zarafatla "tükənmişlik sindromu" kimi xarakterizə edib.

Müğənni bildirib ki, əvvəlcədən razılaşdırılmış işlər istisna olmaqla, heç bir yeni təklifə razılıq verməyəcək.

"Bu, naz etmək deyil. Həqiqətən çox yorulmuşam. Yorğunluğun artıq başqa mərhələsindəyəm. Bu mövsüm demək olar ki, insanüstü sayda konsert vermişəm", - deyə o bildirib.

Akalın, həmçinin iştirak etdiyi televiziya proqramının da yekunlaşmaq üzrə olduğunu qeyd edib. Onun sözlərinə görə, layihənin başa çatmasına cəmi 6 buraxılış qalıb.

Müğənni vurğulayıb ki, televiziya çəkilişləri ilə intensiv konsert fəaliyyətini eyni vaxtda davam etdirmək çətinləşib və qarşıdakı dövrdə əsas diqqətini istirahətə və sağlamlığına yönəltmək niyyətindədir.

Telegramda izləyin