Kamilo Durandan ilk açıqlama: "İlk kolumbiyalı olmaq..."

Şotlandiyanın "Seltik" klubu "Qarabağ"dan Kamilo Duranın beşillik müqavilə ilə komandaya qoşulduğunu açıqlayıb.

Qaynarinfo xəbər verir ki, bu barədə klubun rəsmi saytı məlumat yayıb.

Sayt bildirir ki, Duran ötən mövsüm Azərbaycan təmsilçisinin heyətində çıxış edib, 15 qol vurub. Bu qolların beşi UEFA Çempionlar Liqasında qeydə alınıb. Duran həmçinin 10 məhsuldar ötürmə ilə yadda qalıb.

İndi 24 yaşlı futbolçu karyerasında növbəti addımı ataraq Martin O’Nilin rəhbərlik etdiyi komandaya qoşulub. O, artıq Portuqaliyadakı təlim-məşq toplanışında yeni komanda yoldaşları ilə bir araya gəlib.

"Qarabağ"dan "Seltik"ə keçidindən sonra "CelticPlayer"ə açıqlama verən Kamilo Duran deyib: "Şotlandiyanın ən böyük klubu olan "Seltik" kimi böyük bir komandaya keçmək mənim üçün gerçəkləşən arzudur. Çox xoşbəxtəm və oynamağa, çoxlu qollar vurmağa başlamaq üçün səbirsizlənirəm. İlk dəfə maraq olduğunu eşidəndə heç bir tərəddüdüm olmadı. Sadəcə komandadakı uşaqlarla birlikdə meydana çıxmaq üçün həyəcanlıyam.

Çempionlar Liqasında oynamaq gerçəkləşən arzu idi. Uşaq vaxtı xəyal etdiyiniz məhz budur. Orada qol vurmaq möhtəşəm hiss idi və burada da bunu davam etdirmək, Çempionlar Liqasında qollar vurmaq istəyirəm. Hər oyunda bütün gücümü, böyük əzmkarlıq və fədakarlıqla ortaya qoyuram. Ümid edirəm ki, qollar gələcək.

"Seltik"də çıxış edən ilk kolumbiyalı olmaq mənim üçün böyük şərəfdir. Uşaqlıqdan ölkəmi təmsil etmək arzum olub və ümid edirəm ki, burada "Seltik"də yaxşı çalışaraq bir gün bu arzuma da çatacağam. Baş məşqçiyə burada olduğum üçün nə qədər xoşbəxt olduğumu və təşəkkürümü çıxışımla göstərəcəyimi demişəm. Bu formanı geyinmək böyük şərəfdir və ümid edirəm ki, bu il çempion olacağıq".

Qeyd edək ki, bundan əvvəl "Qarabağ" Kamilo Duranın "Seltik"ə transferini elan edib. Tərəflər keçidin maliyyə tərəflərini açıqlamayıb. Lakin bundan əvvəl "Şotlandiyanın The Herald" nəşri yazıb ki, "Seltik" kolumbiyalı futbolçunun keçidi üçün "Qarabağ"a 5,5 milyon funt-sterlinq (6,4 milyon avro - 12,5 milyon manat) ödəyəcək.

Telegramda izləyin